भांगरभूंय | प्रतिनिधी
पणजी : गोंयच्या रिव्होल्युशनरी गोवन्स (आरजी) पक्षांत भितरले भितर बरेंच कोफुसांव जावपाक लागलां. आमदार विरेश बोरकार हांणी सोशल मिडियाचेर एका पोस्टाक लागून राजकीय मळार बरोच बोवाळ जालो. ह्या पोस्टा उपरांत आमदार बोरकार हांणीय ह्या वादांत उडी मारिल्ल्याची चर्चा रंगली.
आदीं कलम ३९ (अ) चो मुद्दो मुखार आयलो, आतां ताचे सायड इफेक्ट्स मुखार आयले, अशें सुचक वक्तव्य वीरेश बोरकार हांणी आपल्या पोस्टांत केलें. ह्या पोस्टा फाटल्यान नेमको कसलो संदर्भ आसा, हे विशीं तांणी स्पश्ट सांगूंक ना, तरी पक्षांतल्या भितरल्या वादांत ताचो संबंद जुळोवप चालू आसा.
आरजी पक्षांत फाटल्या कांय दिसां पसून धोरणात्मक निर्णय, नेतृत्वशैली आनी कांय संवेदनशील मुद्यांवेल्यान मतभेद आशिल्ल्याची चर्चा सुरू आसा. तातूंतच बोरकार हांच्या पोस्टाक लागून पक्षांतली तिडक आनी भितरलो संघर्श परत मुखार आयला.
मजगतीं ह्या पोस्टाचेर पक्षांतल्या हेर फुडार्यां कडल्यान आजूनय कसलेच तरेची प्रतिक्रिया येवंक ना. मात, सोशल मिडियाचेर ह्या दोगांयची बरीच नेटान चर्चा सुरू आसा. येवपी काळांत आरजींतल्या राजकीय घडामोडींक वेग येवपाची शक्यताय उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
