भांगरभूंय | प्रतिनिधी
वुमेन एंंट्रेप्रेनरशीप प्लॅटफॉर्म सुरू
पणजी : स्वयंपूर्ण गोंय मोहीम आनी स्टार्टअप अनुदानावरवीं बायलांक उद्देग वा वेवसाय सुरू करपाक सरकार मजत करीत आसा. नवो वेवसाय वा उद्येग सुरू करपा खातीर बायलांक सहकार्य करपाक सरकार बांदील आसा. येवजण्यो आनी अनुदानाचो लाव घेत बायलांनी नोकरी मेळोवपाचो येत्न करिनासतना नोकर्यो तयार करपी उद्येजक जावचें, अशें आवाहन मुख्यमंत्री डॉ. प्रमोद सावंत हांणी केलां.
लोकभवनांत वुमेन एंट्रेप्रेनरशीप प्लॅटफॉर्म (डब्लूईपी)चो बिरेस्तारा शुभारंभ जालो. निती आयोग आनी ग्रामीण उदरगत खात्याच्या जोड पालवान हो प्लॅटफॉर्म सुरू जाला. वुमेन एंट्रेप्रेनरशीप प्लॅटफॉर्मची संचालक अन्ना रॉय ह्या वेळार हाजीर आशिल्ली.
गोंय सरकारान स्वयंपूर्ण गोंय मोहीम सुरू केल्या. स्वयंपूर्ण गोंय मोहीमे खाला दुद, भाजी, नुस्ते तशेच हेर गरजेच्या वस्तुंचें उत्पादन गोंयांत जावचें म्हूण विवीध कार्यावळी सुरू आसात. ते भायर स्टार्टअप धोरणा खाला बायलांक १० लाखांचें अनुदान दिवपी येवजण आसा. बायलांनी परंपरीक वेवसाय तशेंच वस्तूंची निर्मिती करून वेवसायान पावल घालचें. वेवसाय वा उद्देगांतल्यान हेरांक लेगीत रोजगाराची संद बायलांनी तयार करची, अशें मुख्यमंत्री डॉ. प्रमोद सावंत हांणी सांगलें.
वुमेन एंट्रेप्रेनरशीप प्लॅटफॉर्मा खाला एका वर्साचो एजेंडा तयार केला. गोंयचे पारंपरीक वेवसाय तशेंच हस्तकारागिरीक उर्बा दिवपा खातीर उपक्रमाचो आस्पाव आसा, अशें संचालक अन्ना रॉय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
