भांगरभूंय | प्रतिनिधी
पणजीः फाटल्या सप्तकांत दृष्टी मरीन जिवरक्षकांनी दोगांक बुडपा पसून वाटयले. तशेंच, हॉलांत दर्यादेगेर चलतना पांय कापिल्ले एके १० वर्सां पिरायेचे चलयेचेक मुळावे उपचार दिले. ते भायर वेगवेगळ्या दर्यादेगांचेर शेणिल्ल्या चार भुरग्यांचो येसस्वी सोद घेवन ताका तांच्या पालकांच्या सुवादीन केलें.
बागा दर्यादेगेर जिवरक्षकांनी गोंय दर्यादेग पुलिसांच्या आदारान बागा दर्यादेगेर शेणिल्ले महाराष्ट्रांतल्या एका १२ वर्सां पिरायेच्या भुरग्याचो सोद लायलो. वळख पटोवन घेवपाची प्रक्रिया पुराय केले उपरांत, पुलिसांच्या हाजेरींत त्या भुरग्याक ताच्या पालकांच्या ताब्यांत दिलो.
मिरामार दर्यादेगेर उदकाच्या ल्हारा लागीं बेशुद्ध अवस्थेंत आशिल्ल्या एका मनशाक जिवरक्षकांनी मदत केली. तो मनीस सोरो पियून आशिल्ल्याचो दुबाव आसा. तो दर्या सावन सुमार ८ ते १० मिटर अंतराचेर पडून आशिल्लो. जिवरक्षकांनी १०८ एम्ब्युलेन्स कडेन संपर्क करून ताका फुडल्या उपचारां खातीर वैजकी पंगडाचे सुवादीन केलो.
हळंत दर्यादेगेर खडपांचेर चलतना एके १० वर्सां पिरायेचे चलयेच्या पांयांक खोल जखम जाली. जिवरक्षकांनी रोखडेंच थंय पावून तिका मुळावो उपचार दिलो आनी व्हांवपी रगत थांबयलें. उपरांत तिका फुडल्या उपचारां खातीर १०८ एम्बुलेन्सींत धाडली.
कोलवा हैदराबादचो एक ९ वर्सां पिरायेचो भुरगो दर्यादेगेर शेणिल्ल्याची म्हायती मेळटांच, थळाव्या जिवरक्षकांनी रोखडोच सोद घेवन ताची वळख पटयली. प्रक्रिया पुराय करून ताका ताच्या सोयर्यांच्या सुवादीन केलो. तशेंच, कोलवा दर्यादेगे वयल्या जार्दिनाचे वाठारांत एकटो मेळिल्ल्या फोंड्याच्या एका ६ वर्सां पिरायेच्या भुरग्याक ताच्या आवय कडेन परत केले.
बाणावले दर्यादेगेर कुटुंबा सावन पयस जाल्ल्या बेळगांवच्या ११ वर्सां पिरायेचे चलयेक जिवरक्षकांनी आदार दिवून तिचे मावशेच्या सुवादीन केली. ह्याच दर्यादेगेर पुण्याच्या एका ३४ वर्सां पिरायेच्या मनशाक पेंवतां पेंवतां दर्यांत आडखळ आयली. नेटान येवपी ल्हारां आनी उदकाच्या प्रवाहाक लागून तो भियेलो. परिस्थितीची खराय वळखून जिवरक्षकांनी रेस्क्यू बोर्डाच्या आदारान दर्यांत उडी मारली आनी त्या मनशाक सुरक्षितपणान देगेर हाडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
