भांगरभूंय | प्रतिनिधी
पणजी : सिंधुदुर्ग जिल्ह्यांतल्या वैभववाडीच्या करुळ (जामदारवाडी) धरणांत बुधवारा सांजेवेळार काळजाक पीळ घालपी घडणूक घडली. न्हांवपाक गेल्ल्या तिगां चलयांक बुडून मरण आयलें. हे घडणुकेन पुराय जिल्ह्यांत दुख्खाचें वातावरण पातळ्ळां. मामाच्या गांवांत सुटयेक आयिल्ल्या ह्या चलयांचेर काळान घालो घालो. तन्वी अनंत माळकर (16), ऋतिका संतोष पाटील (18) आनी स्वरा संदीप सुर्वे (11) अशीं तांचीं नांवां.
हे विशीं मेळिल्ले चड म्हायती प्रमाण, १३ मेक सांजेवेळार चाराचे मजगतीं ह्यो सात इश्टीणी धरणाचेर गेल्ल्यो. पेंवपा खातीर त्यो उदकांत देंवल्यो. मात उदकाचे खोलायेचो अदमास कळूंक नाशिल्ल्यान स्वरा बुडपाक लागलें. ताका वाटावपा खातीर हेर दोगां चलयांनी यत्न केलो. मात त्या यत्नांत तीं दोगांय खोल उदकांत ओडून गेलीं. थळाव्यांनी बोवाळ आयकून धरणा वटेन धांव घेतली. मात ताचे पयलींच त्या तिगांकूय मरण आयलें. चवगां वाटावलीं.
मरण आयिल्ल्या चलयां मदल्यो दोगी करूळ भोयडेवाडीच्यो, जाल्यार एकलें कुसूर गांवांतलें आसा. स्वराचे आज्जेचें ते दीस बारा दीस आशिल्लें, अशें कळटा.
थळाव्यांनी असल्या धोको निर्माण करपी सुवातांचेर प्रशासनान बेगोबेग सुरक्षिततायेचे उपाय करचे, अशी मागणी केल्या. वैभववाडी पुलिसांनी ह्या प्रकरणांत अकस्मात मरणाची नोंद केल्या. हे विशीं पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
