केस्तांव दे कोंफुसांव

भांगरभूंय | प्रतिनिधी

शोले सिनेमांतले जय आनी वीरू हे जिगरी दोस्त. ‘ये दोस्ती हम नहीं तोडेंगे..’ म्हणीत एकठांय बुलेटीचेर हेडटात. तांकां निवृत्त पुलीस अधिकारी, ठाकूर बलदेव सिंह आपयता आनी आपल्या कुटुंबाक काबार करपी गब्बर सिंहाक धरपाचें काम दिता. लटाफटींत जय गुळी लागून मरता, पूण निमणो विरू गब्बराक जिवो धरता. ठाकूराचो उद्देश पूर्ण जाता. हें याद जावपा फाटलें कारण म्हणल्यार रिव्होल्युशनरी गोवन्स पक्षा मदीं चलिल्लो वाद. तळागाळांतल्या सामान्य तरणाट्यांनी मेळून तयार केल्ल्या ह्या प्रादेशीक पक्षा विशीं सगल्यांकूच आपलेंपण आसा. सध्या आरजींत जें कितें चल्लां तें मिटलें ना, जाल्यार आरजीचे दोन कुडके जावपाची भिरांत आसा. अर्थांत राजकी मळार हें नवें न्हय. हांगा पक्ष, संघटणांचे कुडके जातात, ते परतून जुळटात, ‘दुश्मन भी गले मिल जाते है..’ असलो प्रकार राजकारणांत पावला पावलार पळोवंक मेळटा. आरजींतले जय आनी वीरू बुलेटीचेर भोंवताले, मात आयज तांचे मदल्यान ‘उजो’ वचना खंय! आतां ठाकूर मतभेद मिटयना जाल्यार पक्षाचें कितें जायत तें सांगपाक येना. सध्या सोशल मिडियाचेर जय आनी वीरुचे समर्थक ‘शोले’ पेटयत आसात!
आरजींतल्या ह्या केस्तांव दे कोंफुसांवांत आमदार विरेश बोरकारान अजून प्रतिक्रिया उक्तावंक ना. पक्ष मुखेली मनोज परब सोशल मिडियाचेर 1- 1 फुगेटी पेटयत आसा. पक्षाच्या वांगड्यांचेर तो टिका करतना, फाटल्यान ताचे समर्थक रोमट वाजयतना दिसतात. दुसरे वटेन विरेशाचे समर्थक मनोजाच्या समर्थकांचेर फार सोडीत आसात. दोगांयचे समर्थक कुरूक्षेत्रार एकमेकां सामकार पावल्यात. आतां मुखार झूज वाडटा काय पालवता, तें पळोवपाचें. सध्या तरी दोगांयनी फोन बंद दवरल्यात खंय. विरोधकां परस अंतर्गत मतभेदूच पक्षांक चड दुबळे करतात, अशी एक राजकी म्हण आसा. भोवतेक प्रादेशीक पक्ष आंदोलनांतल्यान उबे रावल्यात. संघटणा वाडली, सत्ता मेळ्ळी काय फुडारी, मुखेल वावुरप्यां मदीं संघर्श निर्माण जातात. हाचेर वेळारूच नियंत्रण दवरलें ना जाल्यार पक्ष फुट्टात वा फुडारी हुप्प करून झाडाचे खांदे बदलतात. आमच्या गोंयांतूच हाचीं कितलींशींच उदाहरणां आसात. ल्हान पक्ष तशे आमदारांक फायद्याचे, पूण ही सुवार्थी वृत्ती सोडून मतभेद लोकशाय पद्दतीन सोडयल्यारूच पक्ष चड परिपक्व जातात.
आरजी ही मुळची संघटणा. 3 मार्च 2017 दिसा ती स्थापन जाली. मागीर जानेवारी 22 च्या सुमाराक ती राजकी पक्ष जाली. एक आमदारूय मेळ्ळो. ह्या पक्षा वटेन राज्यांतले 10 टक्के मतदार आसात, अशें जाणकारांचें मत. नव्या प्रादेशीक पक्षा खातीर ही व्हडली गजाल. दोन मुखेल पक्षां परस आरजीन कांय कडेन बरीं मतां घेतल्यांत. काँग्रेस, गोवा फाॅरवर्डाक ते लागींचे. जाणकारांच्या मतान, युती जाल्यार तांकां बरो राजकी फुडार आसा. गोंयची वळख, संस्कृताय, थळाव्यांक हक्क, जमीन ह्या मुद्द्यांचेर तांणी पोगो विधेयकूय तयार केलां. घटनात्मक नदरेन तें वादग्रस्त आसलें तरी, सध्याचे परिस्थितींत जमनी बाबतींत तांकां तेंको मेळपाक शकता. पूण, भितरलीं केस्तांवां आरजीचे संघटणशक्त आनी प्रतिमेक दुबळी करूंक शकतात.
प्रादेशीक पक्ष तिगोवपाक फुडाऱ्यां मदीं एकचार आसप खूब म्हत्वाचो. पक्षांतर्गत मतभेद सोडोवपाक समिती जाय, फुडाऱ्यांक, समितीच्या वांगड्यांक जापसालदारक्यो वांटून दिवपाक जाय. उठसूट सोशल मिडियाचेर वच्चे पयलीं बसकेंत मतभेद सोडोवपाक जाय. खरें म्हणल्यार व्यक्तीकेंद्रीत राजकारण चुकीचें, मुद्द्याचेर भुमिका घेतल्यार पक्षा खातीर ती फायद्याची. तरणाट्या वावुरप्यांक शिस्त, संयम शिकोवप गरजेचें. हें सगलें जाग्यार उडोवपाक सध्या ठाकूराची गरज आसा. नाजाल्यार कोंफुसांव वाडटलें, केस्तांवां चडूच पेट्टलीं आनी मागीर सगलो उजो, उजो… आनी निमणो गोबर !!