भांगरभूंय | प्रतिनिधी
पणजी: हवामान खात्यान मॉन्सून अंदमान आनी निकोबार जुंव्यार 16 मे मेरेन दाखल जावपा खातीर पोशक वातावरण निर्माण जाल्ल्याचें स्पश्ट केलां. मॉन्सून अंदमानांत सादारणपणान 20 मे मेरेन दाखल जाता. अंदूं हांगा मॉन्सून बेगीन दाखल जायत जाल्यार केरळ, गोंय हांगाय मॉन्सुनाचें आगमन बेगीन जावपाची शक्यताय आसा. अंदमान ते गोंय ह्या प्रवासा खातीर सादारणपणान 15 दिसांचो काळ गृहीत धरीत जाल्यार मॉन्सून गोंयांत 4 जून मेरेन दाखल जावंक शकता.
फाटल्या वर्सा मॉन्सून केरळांत आठ दीस पयलींच म्हणल्यार 24 मे दिसा केरळांत दाखल जाल्लो. अनुकूल वातावरण आशिल्ल्यान गोंयांत फक्त एकाच दिसांत म्हणल्यार 25 मे दिसा मॉन्सुनाचें आगमन जाल्लें.
मजगतीं, बुधवारा गोंयांतलें चडांत चड आनी उण्यांत उणें तापमानांत वाड कायम आशिल्ली. पणजेंत चडांत चड 36 अंश जाल्यार उण्यांत उणें 28.8 अंश सेल्सियस तापमानाची नोंद जाली. मुरगांवां चडांत चड तापमान 35.6 अंश आनी उण्यांत उणें तापमान 28.7 अंश सेल्सियस उरलें.
फुडले स दीस गोंयांतलें चडांत चड तापमान 35 ते 36 अंश जाल्यार उण्यांत उणें तापमान 27 ते 28 अंश सेल्सियस मजगतीं उरपाची शक्यताय हवामान खात्यान उक्तायल्या. गोंयांत 14 ते 26 मे मजगतीं जोगलां सयत पावसाची शक्यताय आसा. बुधवारा गोंयांतल्या कांय वाठारांनी किरकोळ पावसाची नोंद जाली. गोंयांत 17 ते 19 मे मजगतीं वातावरण सुकें उरपाची शक्यताय आसा. गोंयांत 1 मार्च ते 13 मे मजगतीं सरासरी 8.9 मिमि पावसाची नोंद जाल्या. अंदूं मॉन्सून पूर्व पावसाचें प्रमाण 49.7 टक्क्यांनी उणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
