भांगरभूंय | प्रतिनिधी
क्रिकेट स्टेडियमा विशीं खेळां मंत्र्याची जीसीएक शिटकावणी
पणजीः क्रिकेट स्टेडियम बांदपा खातीर सरकारान गोंय क्रिकेट असोसीएशनाक (जीसीए) धारगळे सुवात दिल्या. आतां हे सुवातेर क्रिकेट स्टेडियम बांदपाचो काय ना हे विशीं जीसीए भितर गोंदळ निर्माण जाला. हे आडमेळीक लागून जर स्टेडियमाक कळाव जायत जाल्यार ही जमीन सरकार परतून घेवपाक तयार आसा, अशें खेळां मंत्री रमेश तवडकार हांणी सांगलें.
गोंयांत कितले खेपे आडखून पडिल्ल्या अंतरराष्ट्रीय क्रिकेट स्टेडियमाच्या विशयाचेर उलयतना तवडकार हांणी सांगलें की क्रिकेट स्टेडियमाचो विशय सादारण फाटले 3 ते 4 वर्सां जालीं परतून परतून येत आसा.
ज्या वेळार जीसीएन स्टेडियमा खातीर सरकारा कडेन जमीन मागिल्ली ती आमी तांकां धारगळे दिल्या. जमीन दितना नेम आनी अटी लेगीत घाल्यात. जीसीएन स्टेडियम बांदपाचें उतर लेगीत दिलां. जर आनीक कळाव जायत जाल्यार आनी हो स्टेडियम जर जायना जाल्यार जीसीएचेरे फुडली कारवाय आमी करतले, अशी शिटकावणी तवडकार हांणी दिल्या.
सरकारा कडल्यान कसलीच आडखळ ना. आमी जमीन दिवपाचें काम केलां आनी उरिल्ली सगली प्रक्रिया तांणी करपाक जाय. तांचे कित्याक आनी खंय अडटा तें म्हाका खबर ना. जर अश्योच अडचणी येवन कळाव जायत आसत जाल्यार सरकार ही जमीन परतून घेवन कारवाय करतलें. सद्या तांचे मदीं स्टेडियम उबारप काय ना हे विशीं स्पश्टताय नाशिल्ल्या कारणान कळाव जाल्ल्याचें कळून आयलां, अशी म्हायती तवडकार हांणी दिली.
जर जीसीएक स्टेडियम उबारपाचो नासत जाल्यार फुडें स्टेडियमा खातीर सरकार म्हूण आमी कितें करपाक जाता हाचेर विचार चालू आसा. क्रिकेटी विशीं मुखेल काम करपाची जापसालदारकी ही जीसीएची आसा. ताचेर विस्वास दवरून जमीन मागतकच ती दिवपाचें काम आमी केलां. जीसीए अर्थीक नदरेन घटमूट संस्था आशिल्ल्या कारणान हें काम तेच करपाक शकतात. देखून आमी ही जापसालदारकी तांकां दिल्या, अशें तवडकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
