भांगरभूंय | प्रतिनिधी
पणजी: खण खात्यान अर्थीक बोली उक्त्यो केल्ल्या 6 पैकीं 5 खण ब्लॉकांची पावणी येसस्वीपणान पुराय जाल्या. कुडणेंचो (ब्लॉक 13) आनंदम कंपनीक जाल्यार कुडणेंचो (ब्लॉक 14) वेंकटेश्वर राव कंपनीक मेळ्ळा. पिसुर्लेंचो (ब्लॉक 15) जेएसडब्लू कंपनीक जाल्यार पिसुर्लेंचो (ब्लॉक 16) आनंदम कंपनीक फावो जाला. अडवलपाल हांगाचो (ब्लॉक 17) वेंकटेश्वर राव कंपनीक मेळ्ळा. तंत्रीक कारणाक लागून कावरें पिर्ला (ब्लॉक 18) ची पावणी पुराय जावंक ना.
हाचे पयलीं आतां मेरेन 12 खण ब्लॉकांची पावणी जाल्या. आतां 5 ब्लॉकांची पावणी जाल्ल्यान वट्ट 17 खण ब्लॉकांची पावणी जाल्या. सगले ब्लॉक गोंया भायल्या कंपनींक मेळ्ळ्यात.
उत्तर गोंयांतले 5 आनी दक्षीण गोंयांत 1 मेळून 6 खण ब्लॉकांच्या पावणे खातीरची नोटीस खण खात्यान 28 जानेवारी 2026 दिसा जारी केली. कुडणें (ब्लॉक 13, 76.96 हेक्टर), कुडणें (ब्लॉक 14, 41.96 हेक्टर), पिसुर्लें (ब्लॉक 15, 168 हेक्टर), पिसुर्लें (ब्लॉक 16, 105 हेक्टर), अडवलपाल – मोईते (ब्लॉक 17, 113 हेक्टर) हे 5 खण ब्लॉक उत्तर गोंयांत आसात. दक्षीण गोंयांत कावरें मायणा (ब्लॉक 18) हो खण आनी मँगनीज ब्लॉक पावणे खातीर आसा.
ह्या 6 ब्लॉकां खातीर 53 बोली सादर जाल्यो. ह्या 6 खण ब्लॉकांत मेळून 170 दशलक्ष टन खण म्हालाचो सांठो आसा. हाचे पैकीं वर्साक 6.5 दशलक्ष टन खण म्हाल काडपाचो प्रस्ताव निविदेंत आसा. आतां मेरेन ज्या 12 खण ब्लॉकांची पावणी जाल्या तातूंत वर्साक 12.5 दशलक्ष टन खण म्हाल काडप शक्य जातलें. खण ब्लॉकांच्या पावणेक लागून सरकाराक 220 कोटींची येणावळ मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
