भांगरभूंय | प्रतिनिधी
पणजीः रेव्ह्युलेशनरी गोवन्स पक्षा भितरलें कोफुसांव अजूनय शिजता. सद्या विरेश बोरकार हांची कसलीच प्रतिक्रीया येवंक ना. मात तांच्या बरे मागप्यांनी सोशल मिडीयाचेर तांकां तेंको जाहीर केला. तशेंच दुसरे वटेन कांय फेसबूक पेजीच्या माध्यमांतल्यान मनोज परब हांचेर टिका सुरू जाल्या. लंडन सावन संमिश्र प्रतिक्रीया येतात जाल्यार हेर समाज वावुरप्यांनी एकचार राखचो असो उलो मारला.
पक्षाचे सुप्रिमो मनोज परब हांणी सोशल मिडीयाचेर आरजीपीच्या कांय पदाधिकार्यांची बरीच टिका केल्या. हातूंतले चडशे पदाधिकारी हे आमदार बोरकार हांचे लागचे आसात. ह्या केस्तावांक लागून आरजी भितर मनोज परब आनी विरेश बोरकार अशे दोन गट पडल्यात.
मनोज हे फेसबुकाच्या पोस्टा वरवीं तिडक उक्तायत आसात आनी परब हांचे बरे मागपी ते नेटान शेअर करतात तशेंच बोरकार हांच्या बरें मागप्यांक टार्गेट करतात. आयज सकाळीं मनोज हांणी फेसबूकाचेर ‘आयच्या संवसारांत राजनैतिक जावपाक नम्रताय म्हणटात आनी उक्तेपणान उलोवपाक अहंकार म्हणटात.. अशें पोस्ट घालून हो वाद फुडें चालूच दवरला.
दुसरे वटेन बोरकार हे शांत आसात. ह्या वादाचे फाटभूंयेर तांणी प्रतिक्रिया दिवप सामकेंच टाळ्ळां. मात ते सांत आंद्रे लोकांच्या संपर्कांत आसात. आपल्या दर दिसाच्यो कामाच्यो घडामोडी तांणी आयज आनी काल सोशल मिडीयाचेर शेअर केल्यात. मात ह्या वादा विशीं एकूय उतर सोशल मिडीयाचेर काडूंकना.
बोरकार हांचे लागीचे डॅगली फर्नांडीस हांणी ‘विरेश बोरकार हांची शांती’ हो माथाळो घालून एक लेख बरयला. त्या लेखांत डॅगली हांणी म्हटलां, गोंयांत एक विचित्र शांतता पातळ्ळ्या. पूण केन्ना केन्ना… शांतता म्हणल्यार दुबळेंपण न्हय. ती केन्ना केन्ना एका मनशाची झुजा खातीर चलिल्ली तयारी. जेन्ना हेरांनी उलोवपांत, हिशोबांत आनी तडजोडींत कसब मेळयलें… तेन्ना एका आमदारान संघर्शाची वाट वेंचली. विरेश बोरकार हो ताच्या भ्रश्टाचाराक लागून वादांत येवंक ना. तो वादांत आयलो कारण ताणें गोंयच्या ते नसेक हात लायलो. आनी ती नस म्हणल्यार ३९ ए.
डॅगली हांणी घाल्लो पोस्ट बोरकार हांच्या समर्थकांनी नेटान सोशल मिडीयाचेर शेअर केला. हे मजगतीं कांय फेसबूक अकावंट तयार जाल्यात आनी तातूंतल्यान मनोज हांचेर अफरातफरी आनी पक्षात फुट घालपाचे आरोप जाल्यात.
ह्या बोवाळा मजगतीं आरजीपींत शांतता आसा. आरजीपीच्या फुडार्यांनी मिडीयाकडे फोनांचेर उलोवप टाळ्ळां. बोरकार आनी मनोज हे फोन घेनात. सद्या पक्षांत व्हडलो बदल घडोवन हाडपाची प्रक्रिया चालीक लागल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
