भांगरभूंय | प्रतिनिधी
पणजी : केंद्र सरकारान बुधवार सावन भांगर, रुप्यावेल्या आयात शुल्कांत वाड केल्या. आयात शुल्क ६ टक्क्यां वेल्यान १५ टक्के केलां. ह्या निर्णया उपरांत कांय वरांनीच देशा सयत राज्यभराच्या भांगर, रुप्याच्या दरांत बरीच वाड जाल्या.
एक तोळो भांगराच्या दरांत कॅरेटा प्रमाण ८ ते १० हजार रुपयांनी वाड जाली. जाल्यार एक किलो रुप्याचें दर ११ ते १३ हजार रुपयांनी वाडलें. दरवाडीक लागून गुंतवणूक म्हणून भांगर, तशेंच रुप्याची खरेदी उणी जावपाची शक्यताय थळाव्या भांगरा वस्ती वेवसायिकांनी उक्तायल्या. तरी लग्न आनी हेर सणां खातीर खरेदी कायम उरतली असोय विस्वास कांय वेवसायिकांनी उक्तायलो. जाल्यार कांय जाणांनी भांगराचे विक्रे विशीं चिंता उक्तायली.
हे विशीं गोवा ज्वेलर्स असोसिएशनाचे समीर कुडतरकार हांणी सांगलें, आयात शुल्क वाडयिल्ल्यान राज्यांतलें भांगर, रुप्याचें दर अचकीत वाडलां. अशें जरी आसलें तरी आजूनय जीएसटी दर तशेंच कायम आसा. गोंयांत लग्न वा हेर सणां खातीर लोक भांगराची खरेदी करतात. आतां अशे तरेच्या सुवाळ्यांनी भांगर खरेदी करप ही गरज जावन पडल्या. दरवाड जाली तरी गोंयकार लग्ना खातीर भांगराची खरेदी करतलेच. मात फुडाराक गुंतवणूक म्हणून भांगराची बिस्कीट वा बुलियन पद्धतीचें भांगर खरेदी करप्यांचो आंकडो देंवपाक शकता.
तांणी मुखार म्हणलें, कांय दिसां आदीं प्रधानमंत्री नरेंद्र मोदी हांणी भांगर खरेदी करचें न्हय असो उलो मारिल्लो. मात गोंयांत ह्या उल्याक उणो प्रतिसाद मेळपाची शक्यताय आसा. भांगराची खरेदी उणी जाल्यार ह्या वेवसायाचेर निंबून आशिल्ल्या गिरायकांचो विचार जावपाक जाय. तांकां पर्यायी पोट चलोवपाचें साधन खंयचें आसा हें स्पश्ट जावपाक जाय. ह्या वेवसायांत थळाव्या भांगरां वस्ती विक्रेत्यांनी कोट्यांनी रुपयांची गुंतवणूक केल्या. हाका लागून आमचोय विचार करचो. गुंतवणूक म्हणून भांगर खरेदी करचे परस, गरज आसा तेन्नाच तें खरेची करचें असो उलो तांणी मारला.
हेर एका भांगर विक्रेत्यान सांगलें, दर वाड जाल्ल्यान गिरायकांचो आंकडो उणो जावन वेवसायाचेर परिणाम जावपाची शक्यताय आसा. गोंयांत लग्नाक उण्यांत उणें १० तोळे भांगर लोक खरेदी करतात. कांय गिरायकां आदलें भांगर दिवन नवें भांगर करून घेतात. हातूंत भांगर आयात करपाची गरज नासता. हाका लागून हे पद्दतींत करांत सूट दिवपाचो विचार सरकारान करपाक जाय. सुवाळ्यांच्या काळांत भांगराची खरेची वाडचे खातीर आमी विवीध ऑफर दिवपाचो विचार करतले.
मुख्यमंत्र्यांक पत्र बरयतले
समीर कुडतरकार हांणी सांगलें, आयात शुल्क वाडी उपरांत खरेदीचेर जावपी परिणामांचो अभ्यास करतले. उपरांत आमी सरकाराक पत्र बरयतले. हातूंत आमच्यो आमी समस्या मांडटले. अशेच तरेचें पत्र प्रधानमंत्री कार्यालयाकूय दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
