भांगरभूंय | प्रतिनिधी
गुजरात टायटन्सान सेगीत पांचव्या जैताची नोंद केली. हांगाच्या नरेंद्र मोदी स्टेडियमाचेर जाल्ले मॅचींत ताणें सनरायझर्स हैदराबादाक 82 धांवड्यांनी हारायलो. ह्या जैता सयत परतून पयले सुवातेर पावलो. ताचे 12 मॅचींतल्यान 16 गूण जाल्यात.
गुजरातान पयली बॅटींग करतना 5 विकेटी व्हगडावन 168 धांवड्यो केल्यो. ओपनर साई सुदर्शनान सगल्यांत चड 61 धांवड्यो केल्यो. वॉशिंग्टन सुंदरान 33 बॉलांनी 50 धांवड्यांचें योगदान दिलें.
मोखीचो फाटलाव करतना हैदराबादाचो डाव 14.5 ओव्हरींनी फक्त 86 धांवड्यांचेर सोंपलो. मुखेली पॅट कमिन्सान सगल्यांत चड 19 धांवड्यो केल्यो. गुजराता वतीन कगिसो रबाडा आनी जेसन होल्डर हाणें 3-3 विकेटी घेतल्यो. प्रसिद्ध कृष्णान 2 विकेटी मेळयल्यो.
ते आदीं सनरायझर्स हैदराबादाच्या साकिब हुसेन, प्रफुल्ल हिंगे आनी मुखेली पॅट कमिन्स ह्या फास्ट बॉलरांनी शिस्तीन घाल्ले बॉलिंगे नेटार गुजरात टायटन्साक 5 बाद 168 धांवड्यांचेर आडायलो.
हुसेन आनी हिंगे हांणी दरेकी दोन विकेट घेतल्यो, जाल्यार कमिन्सान एक म्हत्वाची विकेट घेवन गुजरात टायटन्साचे बॅटिंगेचेर अंकूश दवरलो.
गुजरात टायटन्सा वतीन साई सुदर्शन आनी शुभमन गिल हांणी डावाची सुरवात केल्ली. पूण, सनरायझर्स हैदराबादान सुरवाती सावनूच धपके दिवपाक सुरवात केली. प्रफुल्ल हिंगेन मुखेली शुभमन गिलाक फक्त 5 धांवड्यांचेर बाद केलो. ते उपरांत जोस बटलर बॅटिंगेक आयलो.
गुजरात टायटन्साचेर चेंपण कायम उरलें, कारण पॉवरप्लेचे अखेरचे ओव्हरींत हिंगेन परतून एकद धपको दिलो. संघर्शमय सुरवाती उपरांत बटलर 11 बॉलांनी 7 धांवड्यो करून बाद जालो, ताका लागून टायटन्साचें संकश्ट वाडलें. ताचे उपरांत तरणाटो निशांत सिंधू मैदानांत आयलो.
निशांत सिंधून सकारात्मक सुरुवात केली आनी पॉवरप्ले उपरांत रोखडोच नितीश कुमार रेड्डीचे बॉलिंगेचेर सको मारलो. पूण, 10वे ओव्हरींत पॅट कमिन्सान ताका बाद करून तंबूंत धाडलो. ते उपरांत वॉशिंग्टन सुंदर बॅटिंगेक आयलो.
सुदर्शन आनी सुंदरान गुजरात टायटन्साचो डाव सांबाळ्ळो. हे जोडयेन म्हत्वाची भागिदारी केली. अदीमदीं चवको मारून धांवतकटो हालयत दवरून डावाचो वेग वाडयलो.
साकिब हुसेनान ही भागिदारी फोटली, ताणें साई सुदर्शनाक 61 धांवड्यांचेर बाद केलो आनी सनरायझर्स हैदराबादाक म्हत्वाचें येस मेळोवन दिलें. सुदर्शन बाद जाल्या उपरांत जेसन होल्डर मैदानांत आयलो.
सुंदरान 19वे ओव्हरींत मलिंगाचे बॉलिंगेचेर दोन चवके आनी एक सको मारून 18 धांवड्यो केल्यो आनी गुजराताक 150 मेरेन पावयलो.
तथापी, हुसेनान अखेरचे ओव्हरींत उत्कृश्ट पुनरागमन केलें. अर्द शेंकडो करपी वॉशिंग्टन सुंदराक ताणें बाद केलो. अशे तरेन सनरायझर्स हैदराबादान गुजरात टायटन्साक 5 बाद 168 धांवड्यांचेर आडायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
