भांगरभूंय | प्रतिनिधी
जेन्ना उमेदवार गोवा कर्मचारी भरती आयोगान दवरिल्ल्यो सगल्यो चांचण्यो पुराय करता; पूण नोकरी मेळपाच्या वेळार कागदपत्रां बरोबर नात अशें सांगून त्या उमेदवाराक घेनात, तेन्ना हांगा चूक कोणाची?
पोरूं 25 डिसेंबराक आमकां भोवमानादीक मुख्यमंत्र्यांचे इन्स्टाग्राम पेजीचेर एक पोस्ट दिसता. ‘89 उमेदवारांक सहाय्यक शिक्षकांच्या पदा खातीर वेंचल्यात. गोंय कर्मचारी भरती आयोगान आयोजीत केल्ल्या परिक्षेंतल्यान हीं भुरगीं वेंचून काडल्यांत’, अशें तांतूत बरयिल्लें. ‘पारदर्शक पद्दतीन ही निवड केल्या’, अशेंय भितर स्पश्ट केल्लें. परत 22 एप्रील 202६ ह्या दिसा परत आमकां पळोवपाक मेळटा 93 जाणांक सहाय्यक शिक्षकांच्या पदा खातीर वेंचल्यात आनी तांका कामार रूजू जावपाक सांगलां. पूण, मे 2025 त जायरात आयिल्ली तेन्ना 118 पदां खातीर अर्ज मागयिल्लें जाल्यार आता इतल्याच जाणांची कशीं निवड जाली, हो मोटो प्रस्न उप्रासता. उरिल्लीं खंय पावलीं? तांचें किदें जालें?
गोवा कर्मचारी आयोगान तांचे सायटीर घाल्ले वळेरेंत 118 उमेदवार आसात जाल्यार फकत 93 उमेदवारांकच किद्याक वेंचून काडले? हाचे फाटलें कारण कितें? सायटीर फकत कागदपत्रां बरोबर नात, इतलेंच सांगलां. पूण कसलीं कागदपत्रां सारकीं नाशिल्लीं हाचो खंयच उल्लेख ना.
जेन्ना उमेदवार गोवा कर्मचारी भरती आयोगान दवरिल्ल्यो सगल्यो चांचण्यो पुराय करता; पूण नोकरी मेळपाच्या वेळार कागदपत्रां बरोबर नात अशें सांगून त्या उमेदवाराक घेनात, तेन्ना हांगा चूक कोणाची? भरती आयोगाची कांय त्या संचालनालयाची जांणी ह्या पदां खातीर अर्ज मागयले?
जग बदलता म्हणतगीर भरतीची पद्दतय आतां बदल्ल्या. 22 डिसेंबर 2025 हे तारखेक दुकुमेत व्हेरिफिकेशनाच्या नांवान सगळ्या उमेदवारांक आपोवन तांचे दुकुमेंत पळोवपाचें नाटक करतात कितें आनी 23 डिसेंबर 2025 क एक वेगळोच व्हॉट्सॲप ग्रुप करून ताचेर मॅसेजी धाडटात. 24 डिसेंबर 2025 क रोजगार मेळाव्याच्या नांवान अमूक जाग्यार येवन तुमची ऑफर लेटरां घेवन चलात, इतलेंच सांगतात. हाचोच अर्थ सरकारी यंत्रणेन आपलीं काम करपाची गती खूबच चड प्रमाणांत वाडोवन बरी केल्या अशें म्हणपाचें दीस आयल्यात. आमकां पयलीच्या सारको वेळ पळोवपाची गरज ना! तशेंच भिवपाचीय गरज ना!
खऱ्यांनीच ही भरती पारदर्शक पद्दतीन जाल्या कांय हांगाय ‘अंदर की बात है’ चो प्रकार घडला तें कळना. जर खऱ्यांनीच भिवपाची गरज ना जाल्यार ह्या उरिल्ल्या उमेदवारांनी आवाज किद्याक काडूंक ना? कांय आपलें फुडलें पिड्यार जातलें ह्या भंयान ते हो त्रास सोंसतात?
गोवा कर्मचारी आयोगान सायटीर उमेदवारांची नांवा घालीं, पूण शिक्षण संचालनालयान ही यादी अजून किद्याक घालूंक ना? व्हॉट्सॲप ग्रुप करून ती मॅसेज घालतात. खंयचें सरकार आतां ऑफिशियल वेबसायट सोडून व्हॉट्सॲपार काम करपाक लागलें?
ज्या एनसीटी फ्रेमवर्का विशीं ते उलयतात, तो शिक्षक संचालनालयाच्या अधिकृत सायटीर खंयच ना. तशेंच तांचे नदरेक आनीक एक गजाल हाडपाची आसा, ती म्हणल्यार, सुप्रीम कोर्टाचो कायदो. तो सांगता, ‘एका उमेदवारान तो विशय ताच्या पदवी शिक्षणांत निमाणें वर्सा शिकूंक ना, पूण पयले दोन शिकला आनी त्याच विशयांत शिक्षण शास्त्रांचें शिक्षण घेतलां. फुडें आपली शिक्षक पात्रताय परिक्षा पास जाला, तशेंच ताणें त्याच विशयांत पदव्युत्तर शिक्षण घेवन सध्या त्याच विशयांत अध्यापनांचें काम करता जाल्यार तो त्या पदा खातीर पात्र थारता.
सगळ्यांत अजापाची गजाल म्हणल्यार हेच लोक, जे उमेदवार बऱ्या मार्कांनी सहाय्यक शिक्षकांचे परिक्षेंत पास जाल्यात तेच उमेदवार गोवा लोकसेवा आयोगान घेतिल्ल्या एडीआय पदा खातीर घेतिल्ले चांचणेंतूय बऱ्या मार्कानी पास जाल्यात. आतां हांगा प्रस्न उप्रासता, एक तर गोंयांत पदव्युत्तर शिक्षण घेतिल्लीं भुरगी नात आनी जे दोनूय परिक्षेंत पास जाल्यात ते खऱ्यांनीच अतिशाणे आनी बुदवंत आसुंये.
हें जालें एका संचालनालयाचें. अशीं खूब आसात. जर खऱ्यांनीच हांगा भिवपाची गरज ना, जाल्यार हांगा ही ‘पारदर्शक भरती’ लोकां मदीं भंय निर्माण करता ताचें कितें!
आकृती नायक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
