नीट जावंक नाशिल्ली परिक्षा

भांगरभूंय | प्रतिनिधी

22 लाख 5 हजार उमेदवारांनी ही परिक्षा दिल्ली. तातूंतल्या प्रामाणीक विद्यार्थ्यांचेर हो अन्याय.

काणी तशी सदचीच. परिक्षेचो पेपर फुटपाची. अंदुंची नीट युजी परिक्षा केंद्र सरकारान रद्द केल्या. फाटल्या 3 मेक ती देशभरांत जाल्ली. वैजकी प्रवेशा खातीर ती म्हत्वाची. पूण पेपर फुटिल्ल्याचो आरोप आनी तपास यंत्रणाचो अहवाल पळोवन हो निर्णय घेतला. 22 लाख 5 हजार उमेदवारांनी ही परिक्षा दिल्ली. तातूंतल्या प्रामाणीक विद्यार्थ्यांचेर हो अन्याय. तांचो फुडार हुमकळटा. आतां परिक्षेची नवी तारीख जाहीर जातली. पूण त्या वेळारूय परतून तेंच जावचें ना कित्या वयल्यान? कारण हो पयलोच प्रकार न्हय, हाचे आदीय साबार परिक्षांचे पेपर फुटल्यात! हो पेपर सगल्यांत पयलीं नाशकाक (महाराष्ट्र) फुटलो. म्हणल्यार म्हुर्ताकूच ‘नासको’ नाल्ल. थंयच्या कांय जाणांक पुलिसांनी ताब्यांत घेतल्यात. हें पेपर फुटीचें जाळें नाशिक तें हरियाणा मेरेन आसा खंय. पेपर फोडून ताच्यो साबार प्रती काडून हजारांनी रुपयांक त्यो विकल्यात. पेपर विकत घेवपी विद्यार्थी आनी तांचे पालक देशाचें कितें बरें करतले? लांच दिवन, पेपर फोडून, काॅपी मारून पास जावन मुखार दोतोर, इंजनेर, अधिकारी जाल्ले उमेदवार म्हणल्यार समाजांत वावुरपी किडेच. गैरप्रकारान वेवसायीक जाल्ले मागिरूय गैरप्रकारूच करिनात कित्या वयल्यान!
पेपर फुटलो काय फक्त प्रस्नपत्रिकाच भायर येना, तर विद्यार्थ्यांचो विस्वासूय तुट्टा. तो निरूस जाता. सगलीं कामां सोडून ताका परतून अभ्यास करचो पडटा. त्रास, मनस्ताप जाता. पयसो, वेळ खर्च जाता. शिक्षणांतलो प्रामाणीकपणा शेणलो, जाल्यार भरपूर गूण मेळटले, पूण गुणवत्ता हारतली. आमच्या म्हान देशाचो दर्जो निसरतलो. राजस्थान पुलिशेच्या स्पेशल आॅपरेशन्स ग्रुपान ही चवकशी सुरू केल्ली. तपासांत तांकां बरीच म्हायती मेळ्ळी. परिक्षा जावचे पयलींच कांय प्रस्न विशिश्ट गटां कडेन पाविल्ले. ही परिक्षा पारदर्शक पद्दतीन जावंक ना, अशेंय दिसून आयलें. उपरांत केंद्रीय तपास यंत्रणांनीय होच निश्कर्श काडलो. म्हणटकच परिक्षा रद्द करचीच पडली. सविस्तर वेळापत्रक अधिकृत वेबसायटीचेर उजवाडायतले. वावड्यांचेर विस्वास दवरचो न्हय, अशें परिक्षा घेवपी नॅशनल टेस्टींग एजन्सीन कळयलां. हे परिक्षेक जीपीएस, सीसीटीव्ही, 5 जी जॅमर सगलें वापरिल्लें, तरीय हो प्रकार घडलो. आतां सुरक्षा वेवस्था चड कडक केल्या खंय.
वैजकी फांट्यांत प्रवेश मेळचो म्हूण लाखांनी विद्यार्थी दोन- दोन वर्सां मेहनत घेतात, कोचिंग घेवपाक पयस वतात. पेपर विकत घेवपी थोडेच आसले तरी सगल्यांकूच परतून परिक्षा दिवची पडटली. सोशल मिडियाचेर भोवतेक विद्यार्थ्यांनी पेपर फुटी विशीं तिडक उक्तायल्या. 2023 उपरांत हे प्रकार बरेच वाडल्यात. नीट, जेईई, रेल्वे भरती, लोकसेवा आयोग, पुलीस भरती, शिक्षक भरती, सगल्याच परिक्षांनी तंत्रीक गोंदळ, गैरप्रकार जाल्यात.
हे प्रकार टाळपाक जाय. प्रस्नपत्रिका निमण्या खिणाक एन्क्रिप्टेड पद्दतीन केंद्रांचेर धाडप शक्य ना? डिजिटल नदर चड खर जाय. दरेका उमेदवाराक प्रस्नांचो क्रम वेगळो दिवचो. कोचिंग दिवप्यांचेरूय नदर जाय. एकाच वेळार परिक्षा घेवचे परस वेगळ्या वेगळ्या दिसा ती घेवं येता. शारांनी आॅनलायन परिक्षा घेवप शक्य आसा. मात खेड्यांनी नेटवर्क मेळप कठीण जातलें. मुळांत काॅमन परिक्षा घेवपाकूच जाय?? गोंयां सारक्या राज्यांत बारावेचे परिक्षेचो दर्जो उंचेलो आसा. स्वतंत्र राज्य परिक्षा आसात. ताचे वयल्यान वैजकी फांट्यांत प्रवेश दिताले. आतां तांचो जागो नीट परिक्षेन घेतला. राज्यांचे अभ्यासक्रम वेगळे, सीबीएसई प्रस्नांक लागून तांकां लुकसाण जाता. थळाव्या भाशांतल्या विद्यार्थ्यांक अडचण येता. समान परिक्षेंत हुशार विद्यार्थी फाटल्यान उरतात आनी कोचिंग आदारीत सर्त सुरू जाता, असो कांय जाणांचो दावो. विद्यार्थ्यांचो हे आनी हेर परिक्षां वयलो विस्वास परतून मेळोवपाची चड गरज आसा.