भांगरभूंय | प्रतिनिधी
धारबांदोड्यां घेतली वेगळ्या वेगळ्या खात्यांच्या अधिकाऱ्यांची बसका
फोंडें: धारबांदोडें म्हालाचे उपजिल्होधिकारी अमितेश शिरवयकार हांणी मंगळारा दनपारां वेगळ्या वेगळ्या खात्याच्या अधिकाऱ्यांची बसका घेवन न्हंयेंत बुडून मरण येवपाच्यो घडणुको बंद करपा खातीर पुलिसांक न्हंयचेर गस्त वाडोवपाचो आदेश दिला. बसकेंत मामलेदार मनोज कोरगांवकार, फोंडें पुलीस स्टेशनाचे निरिक्षक मोहन गावडे, कुडचडें पुलीस निरिक्षक मेलसन कुलासो, कुळेंचे सरपंच गोविंद शिगांवकार, किर्लपालचे पंच रमाकांत गांवकार, धारबांदोडेंचे पंच गुरू गांवकार आनी हेर पदाधिकारी हाजीर आशिल्ले.
बसके उपरांत म्हायती दितना उपजिल्होधिकारी अमितेश शिरवयकार हांणी न्हंयचेर बुडून येवपाचे प्रकार आडावपा खातीर खासा बसका आपयिल्ली. बसकेंत पुलीस निरिक्षक, उपनिरिक्षक, विवीध पंचायतींचे सरपंच, पंच वांगडी, तलाठी आनी सचिवांक आपयिल्लें.
न्हंयचेर शेनवारा आनी आयतारा पुलीस गस्त वाडोवपाचो आदेश दिला. तेच बराबर न्हंयचेर सोऱ्याचे घुंवळेंत शबय घालप्यांक ताब्यांत घेवन कायदेशीर कारवाय करपाचो आदेश दिला.
थळाव्या पंचायती वतीन विवीध सुवातांनी फलक लावप, जेणे करून भायल्यान येवपी लोकांक घाताची सुवात वळखप सोंपें जातलें. न्हंयचेर येवपी लोकां विशींची म्हायती रोखडीच पुलिसांक दिवपा खातीर खासा व्हॉट्सअप गट तयार करतले. म्हायती मेळ्ळे उपरांत रोखडेंच व्हॉट्सअॅप गटांत म्हायती दिले उपरांत पुलिसांक घडणूक थळार वचप सोंपें जातलें अशें सांगलें.
कोडार- बेतोड्यां कृशी खात्याच्या फार्मांतल्यान लोक न्हंयचेर न्हावपा खातीर येतात. हाचे पयलीं त्या वाठारांत खूबशा जाणांक बुडून मरण आयलां. हे संबंदी कृशी खात्याचे संचालक तशेंच बेतोडें पंचायतीक कळोवन गरजेचे उपाय काडटले अशें उपजिल्होधिकारी अमितेश शिरवयकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
