भांगरभूंय | प्रतिनिधी
म्हापशेंः म्हापश्यां भिकार्यांचो आंकडो दिसान दीस वाडत चल्ला. हाचे फाटल्यान एक व्हड संघटीत रॅकेट कार्यरत आसा. नागरिकांक असल्या लोकांक पयशे दिवन तांकां गिन्यांव करपाक उर्बा दिवची न्हय, असो उलो उपसभापती जोशुआ डिसोझा हांणी मारलो.
उपसभापतीन म्हणलें, फाटल्या कांय दिसां सावन म्हापशें पुलिसांनी भिकार्यां आडची मोहीम आनीक खर केल्या. सदांच सरासरी ४ ते ५ गुन्यांव नोंद जातात. ह्या भिकार्यांच्या फाटल्यान एक व्हड जाळें आसा. तांकां शारांत सोडपाक आनी परत व्हरपाक एक थारावीक गाडयेचो वापर जाता. हे लोक गरजेवंत न्हय. तर सामान्य नागरिकांचो फायदो घेतात. हे नियोजीत करून चलयिल्लें एक संघटीत गुन्यांवकारी रॅकेट आशिल्ल्याचो दावो तांणी केलो.
म्हापशें शार भिकार्यांचे समस्येंतल्यान मुक्त जातली. तांचो आंकडो उणो करपा खातीर पुलीस खात्यान खर पावलां उबारल्यां. गुन्यांव नोंद जावपाचें प्रमाण वाडिल्ल्यान ह्या भिकार्यांच्या रॅकेटार बडी बसतली, असो विस्वास उपसभापतींनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
