वीज गिरायकांचो पोस्ट पेड हक्क राखूनच स्मार्ट मिटर बसोवचे उत्तर

भांगरभूंय | प्रतिनिधी

गोंय जिल्लो गिरायक राखण परिशदेचे बसकेंत सुचोवणी

पणजीः वीज खात्याचे स्मार्ट मिटर्स चालीक लायतना गिरायकांच्या हक्कांचेर गदा येवंक फावना. खंयचोय नवो मिटर बसयतना तातूंत ’प्रीपेड’ आनी ’पोस्टपेड’ अशे दोनय पर्याय आसप गरजेचें आसा. सद्याचे मिटर हे पोस्टपेड पद्दती चलतात देखून हे खंयचेय दोनय पर्याय वेंचपाची मेकळीक गिरायकांक दिवची, अशी मागणी उत्तर गोंय जिल्लो गिरायक राखण परिशदेची बसकेंत जाली.
सुमार दोन वर्सांच्या काळा उपरांत उत्तर गोंय जिल्लो गिरायक राखण परिशदेची बसका मंगळारा जाली.
अतिरीक्त जिल्लोधिकारांच्या फुडारपणा खाला जाल्ले बसकेंत गिरायकांच्या हक्कांचेर आनी सरकारी खात्यांच्या कारभाराचेर म्हत्वाचे प्रस्न उप्रासले. बसके उपरांतची म्हायती दितना ’गोंय कॅन’ चे निमंत्रक रोलन्ड मार्टिन्स उलयताले.
बसकेंत लायटी खातीरचो स्मार्ट मिटरांचो विशय प्रामुख्यान माडून सांगलें, जशें नवीन मोबायल कनेक्शन घेतना गिरायक आपल्या आवडी प्रमाण प्रीपेड वा पोस्टपेड पेमेंट पर्याय वेंचून काडटा. तसोच हक्क वीज मिटरांचे बाबतींतय आसपाक जाय. सध्याच्या मिटरांची पद्दत पोस्टपेड आसा, देखून नवीं यंत्रणां येतना गिरायकांचो हो हक्क काडून घेवपाक मेळचो ना, अशें मार्टिन्स हांणी सांगलें.
सरकारी खात्यांनी गिरायकां खातीर गरजेची म्हयती उक्ती करूंक ना. चडशा सरकारी खात्यांनी आपल्या कागाळ निवारण अधिकार्‍याची निवड वा संपर्क क्रमांक जाहीर करूंक ना. तशेंच सरकारी खात्यांच्यो वेबसायट्स पोरन्यो जाल्यात आनी ताचेर नवी म्हायती उपलब्ध ना. खंयचें काम कितल्या दिसांनी जावंक जाय, हाचो तपशील दिवपी ’सिटिजन चार्टर’ खंयच मेळना, अशी खंत मार्टीन्स हांणी उक्तायली.
सामान्य गिरायकांक नेमकें कशें आनी कोणाकडेन वचपाचें हे खबर आसना देखून ते फटवतात. ह्या कारणाक लागून हेर १२ ते १३ खात्यांची ह्या परिशदे भितर आस्पावन घेवपाची मागणी आयज मान्य जाली. २५ जून हो दीस ’राज्य गिरायक हक्क दीस’ म्हण मनयतात. त्या निमतान सगळ्या खात्यांनी ग्राहकां मदीं जागृताय वाडोवची, असो उलो मार्टीन्स हांणी बसकेंत मारलो.
वजन आनी माप खात्यान सुरू केल्ल्या ’क्विक रिस्पॉन्स’ यंत्रणेची परिशदेन तोखणाय केली. हीं यंत्रणां लोकां मेरेन पावोवपाची गरज आसा, जेणें करून लोक रोखडीच आपली कागाळी नोंद करपाक शकतले, अशी सुचोवणी मार्टीन्स हांणी बसकेंत दिली.