भांगरभूंय | प्रतिनिधी
परब आनी बोरकार अशे आतां दोन गट
पणजीः रेव्ह्युलेशनरी गोवन्स पक्षाचीं (आरजीपी) अंतर्गत कोफुसांवां सोशल मिडीयाचेर उक्तडार आयल्यांत. पक्षाचे सुप्रिमो मनोज परब हांणी सोशल मिडीयाचेर आरजीपीच्या कांय पदाधिकार्यांचेर बरीच टिका केल्या. हातूंतले चडशे सांत आंद्रेचे आमदार विरेश बोरकार हांचे लागीचे आसात. परब हांणी सोशल मिडीयाचेर घाल्ल्या पोस्टांचो अदमास घेतल्यार आरजींत फुट पडून दोन गट तयार जाल्ल्याचे स्पश्ट संकेत मेळटात.
फाटले काय म्हयने जाले आरजी पक्षा भितर केस्तांवां पेटिल्लीं. आरजीपीचे आगशेचे पंच जुलियस आल्मेदा हांकां आरजीपीच्या कोअर कमिटीन पक्ष विरोधी कारवायेचो थपको दवरून पक्षांतल्यान भायर काडिल्ले. कमिटीच्या ह्या निर्णयाक लागून आरजीपीचे आमदार विरेश बोरकार निर्शेल्ले. हें कोफुसांव फाटलो म्हयन्योभर भितरले भितर शिजतालें. उपरांत विरेश हांणी पक्षांत सगलें बरें आसा अशें सांगून ह्यो वावड्यो भायरायल्ल्यो.
मात मंगळारा सकाळीं अचकीत मनोज परब हांणी फुर्योज जावन सोशल मिडियाचेर ‘गर्नाल’ मारप चालू केलें. बऱ्याचजाणांनी ते पोस्ट शॅर केल्यात. आरजीपीचे उत्तर गोंय सरचिटणीस, आनी आमदार विरेश बोरकार हांचे वांगडी लिसीयो रोन्कोन हांचे आड परब हांणी टिका केली. साश्टीतले डॅगली फर्नांडीस आनी बार्देशचे मायकल क्वेरोज ह्या म्हालगड्यांक मनोजान लक्ष केलें. धर्माच्या आदाराचेर हे तीग जाण ब्रेनवॉश करतात असो आरोपूय परब हांणी केलो.
‘अध्यक्षपद जाय आसलें, पक्ष जाय आसलो जाल्यार म्हाका सांगचें आसलें, असोच काडून दितां आसलों, जीण दिली मरे पार्टेक, पद कसलें, मनोजान असो रावपाक जाय, तसो उलोवपाक जाय, हें करपाक जाय, तें नाका. चेडूं दिता कितें म्हाका तुमचें? बापायाक भुरगीं जल्माक घालपाक शिकोवचें न्हय. उगडास दवरात…’ अश्या खर उतरांनी मनोज हांणी आपल्याच पदाधिकार्यांची टिका केल्या.
आल्मेदाक काडले उपरांत किजीलां पेटून आरजीत दोन गट जाल्यात. एक गट मनोज परब हांचें समर्थन करता जाल्यार दुसरो गट आमदार विरेश बोरकार हांचें. फेसबुकाचेर मनोजान हो फारपेट बोरकार हांच्या समर्थकांचेर केला आनी मनोजाक तांच्या समर्थकाचो तेंको फावो जाला. तशेंच बोरकार हांचे समर्थक आमचें ब्रॅनवॉश करतात असोय आरोप मनोजाच्या समर्थकांनी फेसबुकाचेर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
