भांगरभूंय | प्रतिनिधी
एसटी आरक्षणा विशीं सरकार गंभीर नाशिल्ल्याचें स्पश्ट : मिशन पॉलिटीकल रिझर्व्हेशन
पणजी : गोंय विधानसभेंत अनुसूचीत जमातींक (एसटी) आरक्षण दिवपी कायदो जाले उपरांत लेगीत ताचे कार्यवाही विशीं सरकार गंभीर ना, असो आरोप मिशन पॉलिटीकल रिझर्व्हेशन संघटणेन केला. आदिवासी कल्याण मंत्री रमेश तवडकार हे शुक्रारा मुख्यमंत्री डॉ. प्रमोद सावंत हांचे कडेन चर्चा करतले. आरक्षणाच्या कार्यवाही विशींची अधिसुचोवणी जारी जायना, तो मेरेन धरणे आंदोलन चालूच उरतलें, अशें संघटनेन स्पश्ट केलां.
संघटनेच्या शिश्टमंडळान मंगळारा मंत्रालयांत आदिवासी कल्याण मंत्री तवडकार हांची भेट घेतली. विधानसभेंत एसटी आरक्षण अधिसुचोवणे विशीं ह्या वेळार चर्चा जाली. संघटनेचे अध्यक्ष जॉन फर्नांडीस आनी म्हणयारे गोविंद शिरोडकार हांणी भेटी उपरांत ही म्हायती दिली. संसदेंत विधेयक संमत जावन राष्ट्रपतीन मान्यताय दिले उपरांत गोंय एसटी आरक्षण कायदो तयार जाला. ताचे कार्यवाही खातीर अधिसुचोवणी जारी करपाची गरज आसा. ती केंद्र सरकारान जारी करपाक जाय. उपरांत केंद्रीय वेंचणूक आयोग वेंचणुकेंत आरक्षण दिवपा विशीचें काम सुरू करतलो. मुख्यमंत्री सावंत हांचे कडेन हो विशय हांव मांडटा आनी चर्चा करता, अशें मंत्री तवडकार हांणी सांगिल्ल्याची म्हायती गोविंद शिरोडकार हांणी दिली.
विधानसभेंत एसटी आरक्षणाच्या कार्यवाही खातीर केंद्र सरकारान अधिसुचोवणी जारी करपाची गरज आसा. ती जावची म्हूण मिशन पॉलिटीकल रिझर्व्हेशन संघटणेन पणजे आदिवासी कल्याण खात्याचे इमारती भायर धरणें आंदोलन सुरू केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
