भांगरभूंय | प्रतिनिधी
चेन्नय : तामिळनाडूचे नवे मुख्यमंत्री जोसेफ विजय हांणी लोकांच्या बर्याचे व्हड निर्णय घेवपाक सुरवात केल्या. मंगळारा मुख्यमंत्र्यांनी राज्यांतलीं प्रार्थनाथळां, शिक्षणीक संस्था आनी बसस्टॅण्डा पसून ५०० मिटरा भितर आशिल्लीं ७१७ सोर्याचीं दुकानां बंद करपाचो आदेश दिला. ह्या निर्णयाक लागून राज्यांतल्या सोरो विक्रेक व्हडा प्रमाणांत निर्बंध येतले. ही सोरो केंद्रां सरकारा वतीन चलयतात.
सरकारी आदेशा प्रमाण, तामिळनाडू स्टेट मार्केटिंग कॉर्पोरेशनच्या खाला चलपी हीं सगळीं दुकानां फुडल्या १५ दिसां भितर कायमचीं बंद जातलीं. हातूंत मुखेलपणान देवळां, मशिदी आनी इगर्जी अशा धर्मीक सुवातीं लागसार २७६ दुकानां, शाळा आनी म्हाविद्यालयां लागसार १८६ दुकानां आनी व्यस्त बस स्टँडां लागसार २५५ दुकानांचो आसपाव आसा.
राज्यांत सध्या वट्ट ४,७६५ सरकारी सोरो विक्री केंद्रां आसात. मात, शिक्षणीक आनी धर्मीक वाठाराचें पावित्र्य राखपा खातीर तशेंच बायलां आनी तरणाटे पिळगेचे सुरक्षितताये खातीर हो निर्णय घेतिल्ल्याचें सरकारान स्पश्ट केलां. मुख्यमंत्री विजय हांणी सगल्या ७१७ दुकानांचेर दोन सप्तकांत कारवाय करून ताचो अहवाल सादर करचो अशे प्रशासनाक निर्देश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
