भांगरभूंय | प्रतिनिधी
नवी दिल्ली : सीबीएसईन (Central Board of Secondary Education) केंद्रीय शिक्षक पात्रता परीक्षा (CTET सीटीईटी) सप्टेंबर २०२६ खातीर अधिसुचवणी जाहीर केल्या. ऑनलायन अर्ज प्रक्रिया ११ मे सावन सुरू जालां. इत्सूक उमेदवारांक १० जून २०२६ दिसा रातच्या ११.५९ वरां मेरेन अर्ज करपाक मेळटले. उमेदवारांक अधिकृत संकेतस्थळ ctet.nic.in आनी cbse.gov.in वेल्यान अर्ज सादर करपाक मेळटले.
सीटीईटीची २२ वी आवृत्ती ६ सप्टेंबर २०२६ (आयतार) तारखेर आयोजीत करतले. पेपर-I आनी पेपर-II दोनूय परीक्षा त्याच दिसा जातल्यो. अर्जदारांचो आंकडो व्हडा प्रमाणांत वाडल्यार ५ सप्टेंबर २०२६ दिसा अतिरिक्त परिक्षा घेवपाक शकता, अशें बोर्डान स्पश्ट केलां.
म्हत्वाच्यो तारखो
ऑनलाइन अर्ज सुरू : ११ मे २०२६
अर्ज करपाची निमाणी तारीख : १० जून २०२६ (रातच्या ११.५९ वरां मेरेन)
शुल्क भरपाची निमाणी मुजत : १० जून २०२६
अर्ज दुरुस्ती विंडो : १५ ते १८ जून २०२६
प्रवेशपत्र उपलब्ध : परीक्षेच्या दोन दिसा पयलीं
परिक्षेची तारीख: ६ सप्टेंबर २०२६
अतिरिक्त संभाव्य परिक्षेची तारीख: ५ सप्टेंबर २०२६
निकाल जाहीर जावपाची शक्यताय : ऑक्टोबर २०२६ अखेर
सीबीएसईन उमेदवारांक अर्ज करचे पयलीं पात्रता निकष, शैक्षणीक अर्हता आनी परीक्षा नेम जतनायेन वाचचे म्हूण उलो मारला. अर्ज भरले उपरांत म्हायतींत बदल करपा खातीर १५ ते १८ जून मजगतीं दुरुस्तीची सुविधा उपलब्ध आसतली.
देशभरच्या १३२ शारांनी आनी २७ भासांनी ही परिक्षा घेतले. केंद्रीय विद्यालय, नवोदय विद्यालय आनी हेर सीटीईटी गुण स्वीकारपी शाळांनी शिक्षक भरती खातीर ही परिक्षा म्हत्त्वाची मानतात.
यत्ता १ ली ते ५ वी शिकोवपाक इत्सूक आशिल्ल्या उमेदवारां खातीर पेपर-I जाल्यार यत्ता ६ वी ते ८वे खातीर पेपर-II आसतले. यत्ता १ली ते ८वी मेरेन अध्यापन करपाक इत्सूक आशिल्ल्या उमेदवारांक दोनूय पेपर दिवपाक मेळटले.
सीबीएसईच्या नेमां प्रमाण परीक्षेंत ६० टक्के वा ताचे परस चड गूण मेळोवपी उमेदवार सीटीईटी पात्र थारतले. मात, सीटीईटी पात्रताय मेळिल्ल्यान सरळ शिक्षक भरतीची हमी मेळना; ती शिक्षक नियुक्ती खातीर गरजेच्या पात्रतां मदली एक अट मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
