भांगरभूंय | प्रतिनिधी
वेेर्णें पुलिसांनी 4 तरणाट्यांक केली अटक
मुरगांव: सांकवाळे बार अॅण्ड रेस्टॉरंण्टांत सोऱ्याचे घुंवळेंत बायल बार धनयाक, तिचे चलयेक आनी सान पिरायेच्या भुरग्याक गाळी संवून मारपेट करून जिवेशी मारपाची धमकी दिल्ल्या प्रकरणांत वेर्णें पुलिसांनी 4 तरणाट्यांक अटक केली.
वेर्णें पुलिसां कडल्यान मेळिल्ले म्हायती प्रमाण शेनवारा रातीं 11 वरांच्या सुमाराक ही घडणूक घडली. सांकवाळे एका बार अॅण्ड रेस्टॉरंण्टांत बायल बार धनयाक सड्यार रावपी तरणाटो सर्वेश परब हाणें वचून गाळी संवपाक सुरवात केली. उपरांत सर्वेशान पयशांच्या कावंटरा कडेन वचून बार धनयाक स्वता खातीर दवरिल्लें जेवण परवानगी घेनासतना जेवपाक सुरवात केली. त्या वेळार ते बायल बार धनयेक ताका आक्षेप घेवन आडावपाचो यत्न केलो तेन्ना ताणें तिका गाळी संवपा बराबरच मारपेट केली.
ह्या वेळार बार धनयाची चली धांवत आयली तेन्ना सर्वेशान चलयेक गाळी संवून मारपेट केली. झगडीं जायत आशिल्ल्याचें समजतकच बार धनयाचो सान पिरायेचो पूत थंय पावलो तेन्ना सर्वेशान ताकाय मारपेट केली.
ह्या वेळार सर्वेशा बराबर देवेंद्र मेस्ता (सडा, मुरगांव), साईश नायक (शिंदोळी – सांकवाळ) आनी पुरुशोत्तम कवळेंकार (कवळें- फोंडें) हे तिगूय इश्ट आसून तांणी बायल बार धनी, तिची चली आनी सान पिरायेच्या चल्याक गाळी संवून तांकां जिवेशी मारपाची धमकी दिली.
घडणुकेची म्हायती मेळटकच वेर्णें पुलिसांनी रोखडीच कारवाय करून सडा, मुरगांवां रावपी सर्वेश परब आनी ताच्या तिनूय इश्टांक ताब्यांत घेवन अटक केली.
वेर्णें पुलीस स्टेशनाचे उपनिरिक्षक प्रिस्ली कारव्हालो ह्या प्रकरणाचो अदीक तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
