रखडिल्ल्या खेळां मैदानाचें तवडकारां हस्तुकीं उक्तावण

भांगरभूंय | प्रतिनिधी

श्रीस्थळ ग्रामसभेंत सेगीत जाताली चर्चा

काणकोण: श्रीस्थळ पंचायतीचे ग्रामसभेंत श्रीस्थळा अर्दवट स्थितींतल्या खेळां मैदाना संबंदी सेगीत चर्चा जाताली, त्या खेळां मैदानाचें काम पुराय जावन सोमारा काणकोणचे आमदार आनी खेळां मंत्री रमेश तवडकार हांचे हस्तुकीं उक्तावण जालें.

ह्या वेळार खेळां खात्याचे संचालक डॉ. अजय गावडे, जिल्हो पंचायत वांगडी अजय लोलयेंकार, श्रीस्थळ पंचायतीच्यो सरपंच सेजल गांवकार, पंच वांगडी राजेश वेळीप, स्पोर्ट्स ऑथॉरिटी गोंयचे भांडारी विनय तुबकी, पंच वांगडी गणेश गांवकार, अभियंते दीपक लोटलीकार, दिवाकर पागी, धीरज नायक गांवकार, रमाकांत नायक गांवकार, प्रभाकर गांवकार, संजू तिळवे, सोमदंत देशमुख, चंद्रकांत सुधीर आनी हेर मानेस्त हाजीर आशिल्ले.

1 कोटी 38 लाख रुपया खर्च करून ह्या खेळां मैदानाचें काम पुराय केलां. सुसज्ज अशे इमारतींत आधुनीक पद्दतीची व्यायाम शाळा सुरू करतले अशें सांगून ह्या खेळां मैदानाच्या कामा संबंदी आदल्या आमदाराच्या खास मनशा कडल्यान लोकां मदीं गैरसमज आनी चुकीची म्हायती पातळावपाचो यत्न सुरू आसा. 2017 ते 2022 मेरेन जो आमदार आशिल्लो ताणें ह्या मैदानाचें काम पुराय करूंक जाय आशिल्लें. पूण तांकां तें शक्य जालें ना, आनी आतां आपणें पुराय करून दाखयलें अशें मंत्री रमेश तवडकार हांणी म्हणलें.

ह्या मैदानार पाचवें तण घालपाचें आशिल्लें, पूण उदकाच्या उणावाक लागून हो प्रस्ताव सद्या तरी मुखार धुकल्ला अशेंय तांणी मुखार उलयतना म्हणलें.

सुरवेक नांवतकट्याचें अनावरण केलें उपरांत फीत कापून मैदान आनी वास्तूचें उक्तावण केलें. ह्या वेळार डॉ. अजय गावडे आनी विनय तुबकी हांचीं उलोवपां जालीं.

मानेस्तांक दीपक लोटलीकार, सनी गरड, रुद्राक्ष देसाय, प्रकाश गांवकार, दिनेश कोमरपंत, अंजली वेळीप, रश्मिता नायक हांणी मानेस्तांक फुलांतुरे भेटयले. कार्यावळीचें सुत्रसंचालन शिरीश पै हांणी केलें.