भांगरभूंय | प्रतिनिधी
पणजी: गँगरीन दुयेंसाक लागून इकरा वर्सां पिरायेच्या भुरग्याक आपलो पांय व्हगडावचो पडिल्ल्याच्या प्रकरणांत वैजकी निश्काळजीपणा केल्ल्यान वाळपय भलायकी केंद्राच्यो वैजकी अधिकारी डॉ. यवंती गावडे हांकां सेवेंतल्यान निलंबीत केल्यात. हे विशीं भलायकी जोड सचीव प्रणब भट हांणी आदेश जारी केला.
ह्या प्रकरणांत तज्ञ समिती कडल्यान खोलायेन चवकशी पुराय जाय मेरेन डॉ. गावडे हांचे निलंबन कायम उरतलें. निलंबना मजगतीं डॉ. गावडे हांकां कसलेच भत्ते आनी पगार मेळचो ना अशें आदेशांत स्पश्ट केलां.
हे विशीं अदीक म्हायती अशी, 27 एप्रील दिसा एका 11 वर्सां पिरायेच्या चल्याक वाळपयच्या भलायकी केंद्राच्या अपघात विभागांत हाडलो. पडिल्ल्यान त्या दुयेंतीच्या दाव्या पांयाक दुखापत जाल्ली. वैजकी अधिकारी डॉ. यवंती गावडे हांणी ताची तपासणी केली आनी डाव्या पांयाचो एक्स- रे काडपाचो सल्लो दिलो. हातूंत दाव्या पांयाक फ्रॅक्चर आशिल्ल्याचें दिसून आयलें. उपरांत दुयेंतीक ऑर्थोपेडीक असिस्टंट म्हूण काम करपी एमटीएस कर्मचारी सुरेश हांणी मुळाव्या वेवस्थापना उपरांत प्लास्टर स्लॅब घालो.
उपरांत 28 एप्रील दिसा सांजवेळा दुयेंतीक जोर, ओंकारी आनी सुस्तीच्या कागाळीं सयत परतून वाळपय भलायकी केंद्राच्या अपघात विभागांत हाडलो. त्या दुयेंतीची तपासणी डॉ. आदित्य गांवकार हांणी केली, आनी दुयेंतीची स्थिती लक्षांत घेवन ताका रोखडोच जीएमसींत धाडून दिलो.
जीएमसीत संबंदीत राबितो दोतोरा कडल्यान मेळिल्ले म्हायती प्रमाण दुयेंतीच्या पांयाच्या बोटांक सूज आयिल्ली आनी दुर्दैवान गँगरिनाक लागून बादीत पांय काडचो पडलो. ह्या प्रकरणांत अंतर्गत समितीन अशें निरिक्षण नोंद केलें की, प्लास्टर स्लॅबाची प्रक्रिया सहाय्यक कर्मचाऱ्यां कडल्यान फावो त्या थेट पर्यावेक्षणा बगर आनी उपचार करपी वैजकी अधिकाऱ्याच्या पुनर्मुल्यांकना बगर पार पाडिल्ली. दुयेंतीची पिराय आनी फ्रॅक्चर संबंदीत घात लक्षांत घेता, सुरवातेच्या पांवड्यारच ताकतिकेचो अस्थिरोग तज्ञांचो सल्लो दिवपाचो विचार जावं येतालो.
अंतर्गत समितीच्या वयल्या निरिक्षणा वेल्यान वाळपच्यो वैजकी अधिकारी डॉ. यवंती गावडे हांणी वैजकी निश्काळजीपणा केल्ल्याचें दिसून आयलें. ताका लागून तज्ञांचे समिती वतीन ह्या प्रकरणाची विस्तारान चवकशी पुराय जाय मेरेन डॉ. गावडे हांची सेवा तत्काळ प्रभावान अनिश्चीत काळा खातीर निलंबीत करपाचो निर्णय खात्यान घेतला. ह्या काळांत त्यो कसलेंच मानधन आनी भत्यां खातीर पात्र थारच्यो नात अशें आदेशांत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
