भांगरभूंय | प्रतिनिधी
आमच्या देसाच्या 75 वर्सांच्या जैताची तोखणाय केले उपरांत आतां म्हजें म्हाकाच हांव भारतीय आसा हे गजालीची लज दिसता. आमी सगळे जाणात कीं आमच्या देशांतल्या न्यायाच्या दर्ज्या विशीं अदमास करूंक जावचोना आनी केन्ना- केन्ना हांगा गुन्यांवकार जिखतात आनी निरपराधी बंदखणींनी कुसतात. पूण, अन्यायांक लागून आमी इतले भेरेल्यात की भिरांत जाणपाची संवेदना आमी व्हगडावन बसल्यात.
2002 वर्सा गुजरातांत दंगल जाल्ली. हातूंत 11 जाणांनी बिल्कीस बानो हे अस्तुरेचेर सामुहीक बलात्कार केल्लो. उपरांत तिच्या घरांतल्या 7 जाणांक जिवानीशी मारिल्ले. हे पासत मारेकारांक न्यायालयान जन्मठेपेची ख्यास्त फर्मायल्ली…. आनी अंदू 15 ऑगस्टाक गुजरातच्या एका सरकारी मंडळान जनतेक कसलेंच पटपा सारकें कारण दिलें बगर त्या इकराय आरोपींची शिक्षा रद्द करून सरकाराच्या माफी दिवपाच्या धोरणा खाला तांकां बंदखणींतल्यान भायर काडले. इतलेंच न्हय तर ह्या खुनमाऱ्यांच्या गळ्यांनी फुलांचे हार घालून तांचो गौरव केलो! मतींत धरपा सारकी गजाल म्हणजे ह्या आकांताळ्या गुन्यांवा मुखार उपरांत 2012 त दिल्लीत निर्भयाचेर जाल्लो बलात्कार आनी तिची केल्ली हत्या हो गुन्यांव ‘काय न्हय’ कसो.
हालींच केंद्रीय घरखात्यान लागू केल्ल्या मार्गदर्शक तत्वांनी बलात्कार आनी खून ह्या बाबतींतल्या ख्यास्तीनी उणाव करचो न्हय, म्हूण सुचोवणी केल्या. पूण, गुजरातच्या सरकारी मंडळाचो हो निर्णय वयल्या तत्वांचा भंग करपी आसा. ह्या बिल्कीस प्रसंगांतली भिरांकूळ आनी काकुळटेणी परिस्थिती पळोवन मंडळ मातूय चुरचुरूंक ना. ती बायल मनीस गुरवार आसली हें स्पष्ट दिसतालें. तरीं लेगीत बलात्कार करपी फाटी सरले नात. एका सान भुरग्याक तांणी वयर उबारलें आनी थंयचे थंय नेटान जमनीर आपटून जिवा निशीं मारलें. कितली क्रूरताय ही! बिल्कीस कुटुंबातल्या फकत तिगांक सोडून हेर सगळ्यांक मारून उडयलीं.
निर्भया व्यभिचारा वगतार एका मनशाची हत्या जाल्ली. बिल्कीस प्रकरणांत 14 मनशांची हत्या जाली. देखून ही घडणूक 14 पटींनी अदिक खुनशी. निर्भया वगतार अख्खो देश संतापिल्लो आनी सगळ्या मारेकारांक फांसार दिवचे म्हूण तो गर्जल्लो. कालांतरान त्या मारेकारांक गोळाक लायलेय बी. फकत एकल्यान आत्महत्या केली. बिल्कीस प्रकरणांत हो संताप 14 पटींनी चड आसप सबावीक आसा. पूण उरफाटें हांगा खुन्यांक मेकळे सोडले.
हो सरकारी मंडळाचो निर्णय एकमतान जालो हे गजालीची म्हाका अदीक भिरभिरी मारता. मंडळातल्या एकल्याय सभाग्यान धाडस करून म्हणलेंना कीं ती गजाल निर्भया परस चड भयानक आसली म्हूण आनी ते खातीर ख्यास्त उणी करप अन्यायकारक जातलें म्हूण.
त्या सरकारी मंडळाचो एक वांगडी आसलेलो भाजपाचो आमदार सी. के. राहुलजी हो त्या गुन्यांवकारांक मेकळे सोडपाचे करणेचें समर्थन करतना म्हणूंक लागलो, ‘ते सगले ब्राह्मण आसले. देखून संस्कारी आसले’ म्हूण. जातीवादाचो हो निर्वाळो तकली सण्ण करणारो आसा. म्हण्टकूच बिल्कीस आनी तिची घरचीं ही ब्राह्मण नासलीं. देखून ती उण्या संस्कारांची आसली असो ताचो अर्थ जालोना?
हांवूय एक ब्राह्मण आनी राहुलजींच्या मापदंडा प्रमाण हांवूय बऱ्या संस्कारांचो. देखून हांव सांगता की बिल्कीस घराण्यांत जाल्लो बलात्कार आनी खून हांकां लागून हांव पुराय हादरलों आनी जाणी हें उणाक कर्तुब केलें तांचो हांव धिक्कार करतां. आनी जे ब्राह्मण हे करणेचें समर्थन करतात तांची म्हाका चड लज दिसता आनी हांव तांचो निशेध करतां.
म्हजे आवयन आपणाले निमणे दीस संन्याशीण म्हूण रुशिकेशाक शिवानंद आश्रमांत सारले. सबाविकूच तिवूय बऱ्या संस्कारांची आसली. पूण ती बिल्कीसाच्या घरांत जाल्ल्या बलात्कारांचो आनी खुनांचो धिक्कार करतली आसली. तिवूय म्हण्टली आसली की हे खुनमारे राकेस म्हळ्यार ब्राह्मण धर्माक आनी शास्त्रांक लागिल्ले कलंक म्हूण.
1947 च्या देशव्यापी दंगली वेळार आमी शिमला हांगा रावतालीं. तेदवेळा एक मुसलमानाचे कुटुंब आमगेर आलाशिरो मागपाक आयिल्लें. हिंदू आनी शिखांचो एक खुबळिल्लो चोंबो तांचे सोदीक आसलो. म्हजे आवयन त्या कुटुंबाक आपल्या घरांत लिपयलें आनी संतापिल्ल्या चोंब्याक सांगलें, ‘तीं गेली. घरांत कोण नात’ म्हूण. तेदवेळा म्हजे आवयन ब्राह्मण संस्कार म्हळ्यार कितें ते दाखयलें. ती ह्या खाटिकांक सांगतली आसली की हिंदू धर्म बलात्कार आनी खून हांकां अघोर कर्तुबां अशें लेखतात आनी तांचो आसपाव हिंसा आनी अधर्म हातुंनी जाता म्हूण.
एका काळार अपराध्यांक बंदखणींतल्यान सोडप ही गजाल लिपचोरयां जाताली. आतां ती राजरोस जावंक लागल्या. चार वर्सां फाटीं जयंत सिन्हाचो मतदारसंघ हजारीबागांत आठ गुन्यांवकार जामिनांचेर सुटलेले. ताणी गोरवांचो व्यापार करपी एका मुसलमानाचो खून केल्लो. उपरांत ह्या अपराध्यांच्या गळ्यांनी फुलांचे हार घालून तांचो भोवमान जालो. ह्या सुवाळ्यात खासा जयंत सिन्हा हाजीर रावलेलो. उपरांत मात तांणी आपणाले हे चुकीक लागून खेद
उक्तायलो.
जायत्या देशांनी जंय खुनमारे लांब काळ मेरेनची ख्यास्त भोगतात, पूण जांकां आपणाल्या करण्यांचो पश्चात्ताप जाला म्हणपाची थंयच्या अधिकाऱ्यांची खात्री जाता, तांच्यो सजा उण्यो करपाची थंय चाल आसा. पूण ह्या बिल्कीस प्रकरणांत गुन्यावकारांनी आपणाल्या पापां खातीर मात्तूय पश्चात्ताप करुंक ना. हाचे उरफाटें भितरल्या एकल्यान सुटका जाले उपरांत ‘आमचेर घाल्लो हो आळ म्हळ्यार एक राजकारण आसलें’ अशें म्हणलें. कितली मधांदपणाची ही भाशा! ताची माफी रद्द करपाक ह्या वयल्या उत्तरां इतलें दुसरें बरें कारण आसचेंना.
जर सरकारान वा सर्वोच्च न्यायालयान ही ख्यास्तीची भोगसणी रदद् करपाक पावलां उबारलीं नात जाल्यार तें कर्तुब म्हळ्यार न्यायाच्या गर्भपाता कडेन आडनदर केल्ले वरी जातलें. भारत हो असो देश जांव नये जंय जांकां फांस फावतात तांकां हार गावतात!
(मूळ लेखक- स्वामिनाथन अय्यर)
प्रदीप लवंदे
9923292022
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
