सगलेच इंधन वाटावया

भांगरभूंय | प्रतिनिधी

…आनी भ्रश्टाचाराचेर नियंत्रण दवरल्यार सगलें जाग्यार पडटलें.

प्रधानमंत्री नरेंद्र मोदी हांणी हैदराबादांत पयर ‘राष्ट्र प्रथम’ हो संदेश दितना कांय आवाहनां केलीं. तीं वयर पसून सकयल मेरेन सगल्याच भारतीयांनी पाळपाक जाय. अमेरिका आनी इझ्रायलाक लागून सगलेच संकश्टांत पडल्यात. आमी परकीय चलन मोडून तेल आयात करतात. ताचो धपको अर्थवेवस्थेक बसचो न्हय, हे खातीर इंधनाची बचत करची असो उलो तांणी मारला, अशें बऱ्याच जाणकारांचें मत. तर विरोधकांच्या मतान, चुकीच्या धोरणांक लागून देशाची अर्थवेवस्था कोसळ्ळ्या, देखून ती साल्वार करपाक हें आवाहन केलां. सरकारान स्वताचें अपेस लिपोवपाक आप- पाप सामान्य भौसाच्या माथ्यार थापलां, अशेंय तांकां दिसता. प्रधानमंत्री मोदी हांणी कठीण काळांत अर्थीक शिस्त पाळपाचो उलो मारला, तर विरोधी पक्ष फुडारी राहुल गांधी म्हणटात, सरकाराचें ‘अर्थीक नियोजन’ अपेशी थारिल्ल्याचो हो पुरावो.
भौशीक येरादारीचो वापर वाडोवचो. इंधनाचो वापर गरजे पुरतोच करचो- गरज नासतना भांगर विकत घेवं नाकात- एक वर्सा खातीर विदेशी भोंवड्यो, डेस्टिनेशन लग्नां टाळात- इंधन वाटावपाक ‘वर्क फ्राॅम होम’ संस्कृताय सुरू करात- स्वदेशिकूच प्राधान्य दियात- रांदपाच्या तेलाचो वापर 10 टक्के उणो करात- सैमीक शेतकाम करात…. अशें कठोर, पूण राष्ट्राच्या हिताचें आवाहन प्रधानमंत्री मोदी हांणी केलां. ‘फुडलें जोत तशें फाटलें जोत’ अशी कोंकणींत एक म्हण आसा. आमी भारतीय अनुकरणप्रीय. सिलेब्रिटीन कितेंय केल्यार लोक ताचें अनुकरण करताच करता. म्हणटकच सिनेमा नट, खेळगडे, फुडाऱ्यांनी देशाक मजत करपाक शक्य तितलीं पावलां उखलूंक जाय. राष्ट्रा विशीं मोग दाखोवपाची ही भांगरा संद. भोंवड्यो, इंधनाचो वापर, स्वदेशी वस्तूंक प्राधान्य ह्या मळांचेर राष्ट्रप्रेमी भारतीय मळबा येदी व्हडली कामगिरी सहज करपाक शकतात.
कोविडाच्या काळांत वर्क फ्राॅम होम चालू आशिल्लें. तें सुरू जाल्यार प्रवास करपी कर्मचाऱ्यांचो आंकडो देंवतलो. आपशीच इंधन वाटावतलें. मात, त्या कर्मचाऱ्यांक अर्दो वा पाऊण पगार मेळूंक जायना. गाडयेकार कर्मचाऱ्यांनी घरांतल्यान काम केल्यार इंधनाची व्हडली बचत जातली. इंधनाचो सगल्यांत चड वापर करतात, तीं सरकारी खातीं. एके सरकारी कार्यावळीक उण्योच 10 ते 25 सरकारी गाडयो वतात. ताचे परस एसी ई बस कित्याक वापरची न्हय? जाय जाल्यार फुडारी, पीए, सुरक्षा रक्षकांक एक बस, पत्रकार- सरकारी अधिकाऱ्यांक दुसरी बस. विदेश भोंवड्यो रद्द करच्यो. आॅनलायन झूम बसके वरवीं सगलें आटपून घेवचें. इंधनाची बचत करपाक आगळे उपाय काडचे. 10 लाखां वयर वर्सुकी येणावळ आशिल्ल्यांचें गॅस अनुदान बंद जावपाचें आसा. प्रत्येक कुटुंबाक लायटी वयली शेगडी, सोलर कुकर अनुदानाचेर दिवचो. ई- बसींचो आंकडो वाडोवचो. हें सगलें करपाक दुडू जाय. म्हणटकच, गरीब सोडून हेर सगल्यांचें अनुदान, येवजण्यो एका वर्सा खातीर स्थगीत दवरच्यो. ह्या आवाहनाक लागून इंधन, भांगर वेपारी, कारागिराचें कितें जातलें, ताचोय विचार जाय.
अर्थवेवस्था दुबळी जाल्या, असो आरोप विरोधक करतात. जीएसटीच्या रुपान करोडांनी रुपया मेळटात, हेर टॅक्सूय आसात. फंड, निधीय बी आसात. कर योग्य पद्दतीन एकठांय केल्यार आनी भ्रश्टाचाराचेर नियंत्रण दवरल्यार सगलें जाग्यार पडटलें. लोकांनी भांगर घेवचें, पूण गरज आसता तेन्नाच. कारण भांगराची आयात डाॅलरांनी जाता. पयसो भायर वता. केन्ना केन्ना फुडारी त्याग, शिस्त, राष्ट्रीय हिताचो संदेश दिता. देखून लोकां मदीं मानसीक तयारी जाता. अर्थीक सादुरताय म्हूण हो संदेश दिला आसूं येता. संकश्ट येवचे पयलीं बचत करपांत कितें वायट आसा? प्रधानमंत्र्यान संदेश दिवं वा ना दिवं कांय गजाली सगल्या राज्य सरकारांनी, केंद्र सरकारान सदांच चालीक लावंक जाय. आनी लोकांनी तांकां हातभार लावंक जाय.