भांगरभूंय | प्रतिनिधी
नागरी पुरवण खातें : केंद्राचे सक्तीचो परिणाम जावचो ना
भांगरभूंय । प्रतिनिधी
पणजी : गोंयांत चडशे विना अनुदानीत सिलिंडराचो वापर जाता. देखून सबसीडी रद्द करपी केंद्र सरकाराचे सक्तीचो गोंयच्या लोकांचेर परिणाम जावचो ना. जे दर सध्या आसात तेच दर लागू जातले, अशें नागरी पुरवण खात्याच्या वरिश्ठ अधिकाऱ्यान सांगलें.
ज्या कुटुंबांची वर्सुकी येणावळ 10 लाख आसा तांचें सिलिंडर गॅस अनुदान रद्द जातलें अशे खूबश्या जाणांच्या मोबायल फोनांचेर मॅसेज आयले उपरांत लोकां मदीं भिरांत तयार जाली.
विवीध गॅस कंपन्यांनी मोबायल फोनांचेर मॅसेज धाडून सांगलें, उपलब्ध आशिल्ल्या येणावळ कर अहवाला प्रमाण तुमच्या वा तुमच्या कुटुंबाचे संबंदांत दिसून आयलां, वट्ट करपात्र येणावळ 10 लाखा वयर आसा. हे विशींचें निवारण करपा खातीर हॅल्पलायन वा ऑनलायन सात दिसां भितर संपर्क करचो. जर कसलोच प्रतिसाद हे वेळ मर्यादे भितर मेळूंक ना जाल्यार एलपीजी अनुदान बंद जातलें.
हे विशीं नागरी पुरवण खात्याचे वरिश्ठ अधिकाऱ्यान सांगलें, हो मॅसेज आयल्यार गोंयकारांक हुस्को करपाची गरज ना. सध्या सगले जाण विना अनुदानीत सिलिंडर वापरतात.
घरगुती गॅस सिलिंडराक गोंयकार 927 रुपया फारीक करतात आनी हो सिलिंडर विना अनुदानीत आसा. देखून हाचेर चड पयशें फारीक करचे पडचे नात. पूण गोंयांतले खूब उणे लोक पीएम उज्वला येवजणेचो लाव घेतात आनी हे येवजणे खाला तांकां दर सिलिंडरा फाटल्यान 300 रुपया अनुदान मेळटा. जर तांची येणावळ 10 लाखा वयर आसत जाल्यार तांची सबसिडी बंद जातली, अशी म्हायती अधिकाऱ्यानी दिली. सध्या गॅस कंपन्यानी गिरायकांचो येणावळ कराचो डेटा आनी वट्ट येणावळ ही टॅली केल्या. देखून जांची येणावळ 10 लाखा वयर आसा तांकां आपोसूक ही मॅसेज आयल्या. अनुदानीत वा विना अनुदानीत सिलिंडराच्या आदाराचेर ही मॅसेज येवंक ना. सध्या कांय लोक फटीची येणावळ दाखोवन अनुदानाचो लाव घेतात देखून तांचेर बडी पडपाक शकता, अशें स्पश्टीकरण अधिकाऱ्यान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
