भांगरभूंय | प्रतिनिधी
मिशन पॉलिटकल रिजर्वेशनाची शिटकावणी
पणजीः आदिवासी समुदायाक आरक्षण दिवपाच्या विधेयकांक मान्यता मेळून ९ म्हयने मायज जाले. मात हे विशींची फुडली प्रक्रीया अजून मेरेन राज्य सरकारान चालीक लावंक ना. राजकी आरक्षण संबंदांत वेचणूक आयोगाक हक्क दिवपा विशीं निमणी अधिसुचोवणी राज्य सरकार जो मेरेन जारी करिना तो मेरेन आदीवासी कल्याण खात्या कडेन धरणें धरतले, अशी शिटकावणी मिशन पोलिटकल रिजर्वेशनचे म्हणयारे गोविंद शिरोडकार हांणी दिली.
आदिवासी समुदायाक राजकी आरक्षण दिवपाचे प्रक्रीयेक नेट दिवपाची मागणी करीत मिशन पॉलीटकल रिजर्वेशनाच्या वांगड्यांनी पणजे आदीवास कल्याण संचालनालया भायर धरणें धरले. हें धरणें आंदोलन फुडले दोन चलतलें.
राजकी आरक्षणा खातीर मतदारसंघाचे पुनर्समायोजन करपाचें विधेयक बिल संसदेंत संमत जावन राष्ट्रपतीची मान्यताय मेळपा मेरेन सगलें जालें. मात णव म्हयने जाले ह्या विधेयकाचेर राज्य सरकारान कार्यवाही करूंक ना, आसो आरोप शिरोडकार हांणी केलो.
आरक्षण प्रक्रीया जशी, आदिवासी गणना ही पुराय जाल्या. फकत वेंचणूक आयोगान आदिवासी लोकसंख्ये प्रमाण मतदारसंघाचें सिमांकन करपाचें उरला. जर सरकारान वेचणूक आयोगाक हक्क दिवपा विशींची चार ओळींची एक अधिसुचोवणी काडट जाल्यार आशिल्ल्या डेटा प्रमाण ही प्रक्रीया पुराय करपाक आयोगाक सुमार दोन ते तीन म्हयने लागतले. ही कल्पना सरकाराक आनी मुख्यमंत्र्याक लेगीत आसा, अशी म्हायती शिरोडकार हांणी दिली.
जें लोकसंख्ये प्रमाण अपेक्षीत मतदारसंघ आरक्षीत जावपाचे आसात त्या मतदारसंघांतल्या आमदारांनी हें आरक्षण दिवचें न्हय म्हण चेंपण घातिल्ल्याचो आमका दुबाव मारता. आमी आदिवासी कल्याण संचालकाक मेळून सांगलां, तुमी आमची मागणी मुख्यमंत्र्याक कळयात. मुख्यमंत्र्याकडेन एकूच मागणें आसा, परतून परतून अंत पळोवं नाकात. ही अधिसुचोवणी काडपाचो आमी सरकाराक दोन दिसांची मुजत दितात आनी त्या मेरेन आमी खात्या मुखार धरण धरतले, अशी शिटकावणी शिरोडकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
