भांगरभूंय | प्रतिनिधी
आदल्या सरकारांनी केन्नाच हिंदू धर्म, संस्कृतीची राखण करूंक ना
पणजी : फुडले पिळगेक धर्मीक, सनातनी करपाचें आसल्यार सनातन धर्म आनी संस्कृती आयच्या जनरेशन झी मेरेन पावूंक जाय. हाचे खातीर भाजप सरकार विवीध उपक्रम चालीक लायिल्ल्याचें मुख्यमंत्री डॉ प्रमोद सावंत हांणी सांगलें. सोमारा पोरणें गोंयां कला आनी संस्कृती खात्या खातीर आयोजीत सोमनाथ स्वाभिमान पर्व २०२६ कार्यावळीच्या उक्तावणाक ते उलयताले. ह्या वेळार केंद्रीय मंत्री श्रीपाद नायक, आमदार राजेश फळदेसाय, खात्याचे संचालक विवेक नायक, स्वामी नरेंद्राचार्य महाराज पिठाचे पदाधिकारी हाजीर आशिल्ले.
मुख्यमंत्र्यान म्हणलें, भाजपाचें सरकार आयले उपरांत देशांत तशेंत राज्यांत धर्मीक आनी सांस्कृतीक उदरगत जाता. ताचे पयलींच्या सरकारांनी केन्नाच हिंदू धर्माची, संस्कृतीची राखण करूंक ना. भाजप सरकारानूच देवूळ परत उबारलें. राज्यांतल्या भाजप सरकारानूय विवीध देवळां उबारल्यांत. हातूंत वेर्णाच्या म्हाळसा नारायणी देवीच्या देवळाचो आसपाव आसा. आदीं पर्यटक पोरणें गोंय म्हणल्यार फकत चर्चींक भेट दिताले. मात आतां हांगच्या देवळांच्या विशेश करून गोवेश्वर देवळाक भेट दिवपाची आंकडो वाडटा. ह्या देवळांत बारा ज्योतिर्लिंगाचें दर्शन एकेच सुवातेर करपाक मेळटा.
तांणी म्हणलें, पुर्तुगेजांनी गोंयच्या सनातन धर्माचेर हल्लो केला. लोक एकठांय येवचें न्हय, आपलो धर्म पाळचो न्हय म्हूण तांणी हजारांनी देवळां उध्वस्त केलीं. आपलो देव धर्म वाटावपाक खुबश्या गोंयकारांक हेर कडेन स्थलांतर करचें पडलें. पुर्तुगेजांनी उध्वस्त केल्ल्या देवळाचो उगडास म्हणून आमी दिवाडे बेटाचेर कोटी तीर्थ हांगा एक व्हडलें देवूळ बांदतले. हाचें काम बेगीनूच सुरू जातलें. सप्तकोटेश्वर देवळाचें नुतनीकरण करपाचें कामूय आमच्याच काळांत जालें. प्रधानमंत्री नरेंद्र मोदी हांणी आयज देशभरच्यान सोमनाथ पर्वाची सुरुवात केल्या. हाका लागून सनातन धर्माची वृद्धी जावपाक मजत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
