भांगरभूंय | प्रतिनिधी
पणजी : फाटले कांय दीस वीज खात्या वतीन जावपी स्मार्ट वीज मिटरावेल्यान वाद सुरू आसा. वीज खात्यान असले मिटर बसोवप स्कतीचें सांगलां. मात कांय समाजीक कार्यकर्ते, एनजीओंनी अशी कसलीच सक्ती करपाक मेळची ना अशें सांगिल्लें. आतां ह्या वादाची दखल मानवाधिकार आयोगानय घेतल्या. हे विशीं आयोगान खात्याच्या मुखेल अभियंत्यांक नोटीस धाडल्या. आयोगान मुखेल अभियंतो वा तांच्या प्रतिनिधींक २ जुनाक सुनावणीक हाजीर रावपाक सांगलें.
आयोगान ह्या प्रकरणाची स्वेच्छा दखल घेतल्या. स्मार्ट मिटर बसोवप सक्तीचें केल्यार मानवाधिकार मोडिल्ल्याची शक्यताय आशिल्ल्याचें आयोगान म्हणलां. वीज खात्याक २ जुनाक हे विशीं जाप वा अहवालूय सादर करचो पडटलो. ह्यान पयलीं खात्यान बिरेस्तार ७ मेक नोटीस जारी करून स्मार्ट मिटर सक्तीचो केल्ल्याचें स्पश्ट केल्लें. केंद्रीय मंत्र्यांनी संसदेंत अशी सक्ती जावची ना हें स्पश्ट केल्ल्याचें तांणी सांगिल्लें.
वीज खात्याचे नोटीसींत म्हणलां, सध्याच्या वीज मिटराचे सुवातेर डिजिस्मार्ट नेटवर्क्स हांचे वतीन स्मार्ट मीटर्स बसोवपाची प्रक्रिया ह्या खात्यान सुरु केल्या. जोड वीज नियामक आयोगच्या (जेईआरसी) नेमां प्रमाण अशे मिटर बसोवप सक्तीचें आसा. तशेंच केंद्र सरकारान निर्देशित केल्ले वेळ मर्यादे भितर मिटर बसोवपाची प्रक्रिया पुराय करप गरजेचें. मिटर बसोवपाचे प्रक्रियेंत गिरायकां कडल्यान सहकार्य करचें. स्मार्ट मिटराच्या अत्याधुनीक तंत्रज्ञानाक लागून गिरायक तशेंच खात्याकूय फकयदो जातलो.
स्मार्ट मिटराक लागून वीज वापर रिअल टायम डेटाचें विश्लेशण करून वीजेचो कार्यक्षम वापर करप शक्य जातलो. खात्या वतीन निवड केल्ल्या डिजिस्मार्ट नेटवर्क्स प्रा. लि. हाचें प्रशिक्षीत कर्मचारी मिटर बदलतले. तांचे कडेन वीज खात्यान जारी केल्लीं वैध वळखपत्रां आसतलीं. कसलीय म्हायती दिवप, मिटर बदलपाक मान्यताय दिवप, हाचे पयलीं गिरायकांनी ह्या कर्मचार्यांच्या वळखपत्राची छाननी करची अशें नोटीसींत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
