भांगरभूंय | प्रतिनिधी
पणजी : फाटल्या सप्तकाचे तुळेंत सोमारा पणजी बाजारांत भाजयांच्या दरांत परत वाड जाल्ली पळोवपाक मेळ्ळी. भाजयांची आवक उणी जाल्ल्यान वालपापडीचें दर दुपेटीन वाडून २५० रुपया किलो जालें. आल्याचें दर वाडून ३०० रुपया किलो जालें. लिंबू आकारा प्रमाण ८ ते १० रुपयांक एक नग आशिल्लो. टोमॅटोचें दर वाडून ६५ रुपया किलो जालें. बटाटाचें दर १० रुपयांनी वाडून ५० रुपया किलो जालें. कोथमिरीची जुडी ४० रुपयांक आशिल्ली. फुडले कांय दीस भाजयांचें दर वाडतूच रावपाची शक्यताय व्यापार्यांनी उक्तायली.
बाजारांत मानकुराद आंबो आकारा प्रमाण २०० ते ८०० रुपया डझन ह्या दरांत विकताले. जाल्यार हापूस आंब्याची आवक चड नाशिल्ल्यान ताचें दर ५०० ते ८०० रुपया डझन आशिल्लें. कांदो ४० रुपया किलो आशिल्लो. भेंडो, घोसाळीं, गाजर, काराथीं, गवार दरेकी ८० रुपया किलो दरान विकताले. वायंगीं आनी तवश्याचें दर ६० रुपया आशिल्लें. व्हड वायंगीं ८० रुपया किलो आशिल्लीं. कोबी ४० रुपया किलो, जाल्यार फ्लॉवर ४० रुपयांनी आशिल्लो. तशेंच पुदिना १५ रू., मेथीची जुडी १५ रुपयांक आशिल्ली. लसूण आकारा प्रमाण २०० ते ४०० रुपया किलो आशिल्लें.
बाजारात मिरसांग ८० रू. जाल्यार ढब्बू मिरची १३० रुपया किलो आशिल्ली. जांबळां ३०० रुपयांक १०० नग, काण्णां १०० रुपया वाटो अश्या दरान विकताले. बाजारांत ल्हान निरपणस ४०० रुपया, जाल्यार मध्यम आकाराचा निरपणस ५०० रुपया नग असो विकताले. फलोत्पादन मंडळाच्या गाड्यांचेर कांदो २४ रु., टमाट ४५ रु. जाल्यार बटाट २५ रुपया किलो आशिल्लो. जाल्यार भेंडे २० रू., कोबी २६ रू., गाजर ४५ रू., वाल पापडी २०० रू., मिरसांग ४५ रुपयांनी विकताले. जाल्यार फ्लॉवराचें दर २८ रुपया आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
