भांगरभूंय | प्रतिनिधी
नवी दिल्ली: २०२४ वर्सा भारताची अर्थवेवस्था संवसारांत पांचव्या नंबराचेर आशिल्ली. मजगतीं, एका वर्सांत रुपयाचें मोल सुमार पांच टक्क्यांनी देंवलां. हाका लागून भारतीय अर्थवेवस्थेचें मोल डॉलरांत उणें जालां. अशे परिस्थितींत सध्याच्या (२०२५) मुल्यांकना प्रमाण भारतीय अर्थवेवस्था आतां सव्या नंबरार पाविल्ल्याची म्हायती आंतरराष्ट्रीय नाणेनिधीच्या नव्या अहवालांत जारी केल्या.
भारताचो उदरगत दर सध्या संवसारांत सगल्यांत चड आसा आनी येवपी काळांतूय कायम उरतलो हे गजालीचेर नाणेनिधीन शिक्को मारला. मात डॉलरांत भारतीय अर्थवेवस्थेचें मुल्यांकन हेर देशां परस उणें जालां. सध्याच्या मुल्यांकना प्रमाण भारतीय अर्थवेवस्था ३.९२ लाख कोटी डॉलरची आसा.
ब्रिटीश अर्थवेवस्थेची किंमत ४ ट्रिलियन डॉलर, जपानी अर्थवेवस्थेची किंमत ४.४४ ट्रिलियन डॉलर, अमेरिकन अर्थवेवस्थेची किंमत ३०.८ ट्रिलियन डॉलर आनी चीनाची अर्थवेवस्था १९.६ ट्रिलियन डॉलर आसा. जर्मनीचे अर्थवेवस्थेचें मोल ४.७ ट्रिलियन डॉलर आसा. २०२४ वर्सा भारताची अर्थवेवस्था ३.५ ट्रिलियन डॉलर आनी ब्रिटनाची ३.४ ट्रिलियन डॉलर आशिल्ली. मात नव्या मुल्यांकनांत भारत आतां ब्रिटना परस फाटीं गेला.
पूण हो फरक सामकोच ल्हान आशिल्ल्यान भारत रोखडोच हो फरक भरून काडटलो. संवसारीक परिस्थिती सुदारली आनी भारतीय रुपयाचें मोल स्थीर जालें जाल्यार भारत परतून तिसरी वा चवथी व्हड अर्थवेवस्था जावपाची शक्यताय न्हयकारूं येना. भारतीय अर्थवेवस्था रुपयांच्या मळार अजूनय उंचेल्या पांवड्यार आसा, पूण राश्ट्रीय उत्पन्नाचें मोल थारावपाचें मुळावें वर्स हालींच्या काळांत बदललां.
डॉलर बळिश्ट जाला. हाचो परिणाम ह्या आंकड्यांचेर जाला. २०२४ वर्सा भारतीय रुपयाचें मोल दर डॉलराक ८४.६ रुपया आशिल्लें. २०२५ वर्सा दर डॉलराक ८८.५ रुपया जालो. सध्या रुपया दर डॉलराक ९२ रुपया आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
