भांगरभूंय | प्रतिनिधी
मुख्यमंत्रीः जागृताये खातीर विद्यार्थी, शिक्षकां कडेन करतले संवाद
भांगरभूंय I प्रतिनिधी
पणजी : मुळाव्या पांवड्या पसून विद्यार्थ्यांक मुल्यवर्धीत शिक्षण दिवपी गोंय देशांतलें पयलें राज्य आसा. हाची दखल केंद्र सरकार निश्चीत घेतलें, असो विस्वास मुख्यमंत्री तशेंच शिक्षण मंत्री डॉ. प्रमोद सावंत हांणी उक्तायला.
मुल्यवर्धीत शिक्षण आनी नव्या शिक्षणीक धोरणा विशीं जागृताय करपाक 19 सप्टेंबराक आपूण राज्यांतल्या सरकारी शाळांचे विद्यार्थी, शिक्षक, पालक तेच प्रमाण सरपंच, पंचां कडेन व्हर्च्युअल पद्दतीन संवाद करतले, अशें तांणी सांगलें.
मुल्यवर्धीत शिक्षणाची म्हायती दिवपाक बिरेस्तारा पाटो-पणजेंतल्या पर्यटन भवनांत घेतिल्ले पत्रकार परिशदेंत मुख्यमंत्री उलयताले.
ह्या वेळार तांचे वांगडा शिक्षण संचालक शैलेश झिंगडे, मुल्यवर्धीत शिक्षण दिवपी शांतीलाल मुत्था फावंडेशनाचे अध्यक्ष शांतीलाल मुत्था, कांता पाटणेंकार, नागराज होन्नेकरी हाजीर आशिल्ले.
शांतीलाल मुत्था फावंडेशन 2016 पसून राज्यांतल्या 716 शाळांनी मुल्यवर्धीत शिक्षणाचो प्रकल्प फुकट राबयता. हाचो विद्यार्थी, पालकांक व्हड लाव जाला. पयली ते चवथी मेरेनच्या विद्यार्थ्यांनी मुळाव्या पांवड्यार मुल्यवर्धीत शिक्षण घेतलां. ताका लागून राज्यांतल्या शिक्षणीक मळार क्रांती जाल्ल्याचे दिसून येतले, अशेंय मुख्यमंत्र्यान म्हणलें.
आतां मेरेन 700 परस चड शाळा, 1,700 परस चड शिक्षकांनी हाचो लाव घेतला. फक्त सरकारीच न्हय, जाल्यार अनुदानीत शाळांतल्या विद्यार्थ्यांकूच मुल्यवर्धीत शिक्षण दिलां, अशें शिक्षण संचालक शैलेश झिंगडे हांणी म्हणलें.
शिक्षणीक धोरणा प्रमाण शिक्षणांत बदल
शांतीलाल फावंडेशनान 2016 पसून गोंयांत मुल्यवर्धीत शिक्षण दिवपाची मोहीम सुरू केली. ताचे पयलीं महाराष्ट्रांतल्या सुमार 500 शाळांनी फावंडेशना कडल्यान हो उपक्रम मुळाव्या पांवड्यार सुरू अाशिल्लाे, अशी म्हायती शांतीलाल मुत्था हांणी दिली. नव्या शिक्षणीक धोरणा प्रमाण शिक्षणांत गरजेचें बदल केल्यात, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
