भांगरभूंय | प्रतिनिधी
मडगांव: भर बाजारांत जाल्ल्या स्वप्निल वाळके खून प्रकरणांतल्या मुखेल दुबाविताक पुलिसांच्या निश्क्रियतायेक लागून जामीन मेळ्ळो. स्वप्निल हे भाजपची ज्येश्ठ फुडारी कृष्णी वाळके हांचे पूत. जर सत्ताधारी पक्षाच्या फुडार्यांच्या कुटुंबाकूय न्याय मेळना, जाल्यार राज्यांतल्या सामान्यांची परिस्थिती कितें आसतली, हे विशीं विचार केल्लो बरो, असो प्रस्न आमदार विजय सरदेसाय हांणी उक्तायलो.
मडगांवां दिसा उडवाडा जाल्ल्या ह्या खून प्रकरणाक स वर्सां जालीं. ह्या प्रकरणांतल्या शंभर परस चड साक्षीदारां मदल्या फकत सात जाणांचे जबाब आतां मेरेन नोंद केल्यात. पुलिसांनी वेळार साक्षीदारांक न्यायालया सामकार करूंक नाशिल्ल्यान हाचो फायदो दुबाविताक जाला आनी ताका जामीन मंजूर जालाो. हाचेवेल्यान पुलिसांच्या तपासाचेर प्रस्न निर्माण जाला. तपास अधिकार्यांची जापसालदारी निश्चीत करप गरजेचें आशिल्ल्याचें सरदेसाय हांणी नमूद केलें.
मुख्यमंत्री डॉ. प्रमोद सावंत हांचे पयलीं सावन कृष्णी वाळके भाजपांत कार्यरत आसात. तांच्याच सरकाराच्या काळांत पक्षाच्या ज्येश्ठ फुडार्याच्या पुताच्या खून प्रकरणांत पुलीसांनी असो कारभार चालू दवरला जाल्यार ही सामकी गंभीर गजाल आसा. गुन्यांवगाराक धरपी पुलिसांचो भोवमान जावपाकूच जाय. मात त्या आरोपीक ख्यास्ती मेरेन पावोवपाची जापसालदारी तितलीच म्हत्वाची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
