भांगरभूंय | प्रतिनिधी
प्रमाणपत्रांचो पालिका वेंचणूक लडोपा खातीर जालो गैरवापर
पणजी : भंडारी समाजा वतीन दिल्ल्या प्रमाणपत्रांचो गैरवापर कांय जाणांनी पालिका वेंचणूक लडोपा खातीर केलो, असो आरोप भंडारी समाजाच्या वांगड्यानी आयतारा जाल्ले साबार बसकेंत केलो. समाज समिती वतीन प्रमाणपत्र दिवपाक कांय जाणांनी तेंको दिलो जाल्यार कांय जाणांनी विरोध केलो. प्रमाणपत्रां दिवपा खातीर दिल्ल्यो अर्जाच्यो पुस्तिका म्हाल समित्यांकडल्यान परत मागोवपाचो निर्णय घेतला. मात प्रमाणपत्राचेर कसलोच निर्णय जावंक ना. भंडारी समाजाचे प्रशासक एस. व्ही. नायक हांच्या फुडारपणा खाला पणजे इन्स्टिट्यूट मिनेजीस ब्रागांझा सभाघरांत साबार बसका जाली. साबार बसकेंक १३७ वांगडी हाजीर आशिल्ले.
भंडारी समाज समितीचेर सरकारान ६ म्हयन्यां खातीर प्रशासकाची नेमणूक केल्या.
भंडारी समाजाचे मतदार वळेरीचेर ३९१४ नांवां आसात. मतदार वळेरींतल्या नांवांची तपासणी करपा खातीर दरेका म्हालांत २ वांगड्यांची समिती स्थापन केल्या. बार्देश आनी फोंडें म्हालांत ३ वांगड्यांची समिती काडल्या. हे समिती खाला उपसमिती आसतली. दरेकी म्हालांतले मतदार वळेरींत आशिल्ल्या नांवांची तपासणी जातली. फुडले बसकेंत मतदार वळेरी निश्चीत जातली. फाटले समितीच्या कार्यकाळांत २०२१ ते २०२६ मेरेनच्या कारभाराचें ऑडीट जातलें. म्हापशें आनी मडगांवां समाजाचें सभाघर आसा. ह्या सभाघरांच्या वापराचो नियाळ घेवपा खातीर समिती स्थापन केल्या.
मुंबय उच्च न्यायालयाच्या आदेशा प्रमाण आयची साबार बसका जाली. वेंचणूक पद्दतिचेर चर्चा करपाचो मुददो अजेंड्याचेर आशिल्लो. मात हाचेर चर्चा करपाक मेळची ना, असो आदेश गोंयांतल्या मुंबय उच्च न्यायालयान दिल्ल्यान हाचेर चर्चा जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
