भांगरभूंय | प्रतिनिधी
चेन्नय: ’तमिळगा वेट्री कझगम’चे मुखेली आनी अभिनेता-राजकारणी सी. जोसेफ विजय हे तमिळनाडूचे नवे मुख्यमंत्री जाले. तांणी तमिळ भाशेंत सोपूत घेतलो. ह्या सोपूत घेवपाच्या सुवाळ्या वेळार राहुल गांधी हाजीर आशिल्ले.
सोपूत घेतना विजय हांणी थारायिल्ल्या शब्दां भायले शब्द वापरपाक सुरवात केली तेन्ना राज्यपाल राजेंद्र अर्लेकार हांणी तांकां आडयले. आनी बरोवन दिल्ले शब्दूच सोपूत घेतना वापरपाची सुचवणी दिली.
विजय हांचे वांगडा आनीक णव मंत्र्यांनी सोपूत घेतले. हातूंत एन. आनंद, अधव अर्जुन, डॉ. के.जी. अरुणराज, के.ए. सेनगोट्टैयन, पी. वेंकटरमणन, आर. निर्मलकुमार, राजमोहन, डॉ. टी.के. प्रभू आनी सेल्वी एस. कीर्तना हांचो आसपाव आसा.
हे सगले आमदार विजय हांच्या ’टीव्हीके’ ह्या पक्षाचे वांगडी आसात. सध्याचे स्थितींत, विजय हांच्या पयल्या मंत्रीमंडळांत आघाडीचेर आशल्ल्या इश्ट पक्षाच्या एकाय आमदाराचो आसपाव करूंक ना.
फिल्म इंडस्ट्रींतल्यान निवृत्ती घेवन सावथ सुपरस्टार थलपती विजय हांणी राजकारणांत एन्ट्री मारली. तांणी पयलीच फावट वेंचणूक लढयली आनी ते जिखलेय. विजयच्या ’तमिळगा वेत्री कळघम’ ह्या नव्या पक्षान सगल्यांत चड सुवातो मेळयल्यो. आपले दमदार कामगिरी उपरांत राजकीय मळार पावल दवरले उपरांत आयज विजयान तमीळनाडूचे मुख्यमंत्री म्हणून सोपूत घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
