भांगरभूंय | प्रतिनिधी
121 आमदारांचो तेंको : व्हीसीकेन दिलें समर्थन पत्र
खबरां संस्था
चेन्नय : टीव्हीकेचे मुखेली सी. जोसेफ विजय आयतारा तामिळनाडूच्या मुख्यमंत्रीपदाचो सोपूत घेवपाची शक्यताय आसा. एके खबरा संस्थेच्या सुत्रां प्रमाण हो सोपूत सुवाळो चेन्नयच्या जवाहरलाल नेहरू इनडोर स्टेडियनांत दनपारां 3.15 वरांचेर जातलो. विजय हांणी शेनवारा लोकभवनांत राज्यपाल राजेंद्र आर्लेकार हांची भेट घेतली आनी सरकार स्थापन करचे खातीर 121 आमदारांचीं तेंको दिवपी पत्रां सादर केलीं. आपलें भोवमत सिद्ध करचे खातीर 118 आमदारांच्या तेंक्याची गरज आशिल्ली.
तामिळनाडू विधानसभा वेंचणुकेच्य निकालाच्या सव्या दिसा, अभिनेतो विजय हाचे खातीर सरकार स्थापनेचो मार्ग मेकळो जाला. तीन दिसांच्या कळावा उपरांत वेंचणुकेंत दोन सुवातो जिखिल्ल्या व्हीसीकेन विजय हांच्या टीव्हीके पक्षाक आपलें तेंक्याचें पत्र सादर केलें.
व्हीसीकेचे अध्यक्ष थोल थिरुमावलवन हांणी टीव्हीके फुडारी अधव अर्जुन हांकां तेंक्याचें पत्र दिल्ल्याचो एक फोटो लेगीत मुखार आयला. विजया हांच्या टीव्हीके पक्षाक हाचे आदीं 116 आमदारांचो तेंको आशिल्लो. व्हीसीकेचो तेंको मेळ्ळे उपरांत हो आंकडो भोवमताच्या आंकड्या परस एकान वाडून 119 जाला.
मजगतीं, घोडेबाजाराच्या भंयान काँग्रेसीन आपले पांच आमदार हैदराबादाक धाडल्यात. पक्षाच्या सुत्रान दिल्ले म्हायती प्रमाण, मेलूरचे आमदार पी. विश्वनाथन हे आमदारांच्या ह्या गटाचें फुडारपण करता. टीव्हीकेचें सरकार स्थापन जालें जाल्यार पी. विश्वनाथन हांकां मंत्री म्हूण मंत्रीमंडळांत सुवात मेळूं येता, अशेंय सुत्रांनी संकेत दिल्यात.
234 वांगड्यांचे विधानसभेंत टीव्हीकेन 108 सुवातो जिखल्यात, तातूंतल्यो विजय हांणी दोन सुवातो मेळयल्यात. व्हीसीकेच्या आदींच सरकार स्थापन करचे खातीर टीव्हीकेन काँग्रेस, सीपीआय आनी सीपीआय (एम) हांचो तेंको मेळयिल्लो. काँग्रेसीचे पांच आमदार आसात, जाल्यार सीपीआय आनी सीपीआय (एम) चे दरेकी दोन आमदार आसात.
मजगतीं, व्हीसीकेचे मुखेली थिरुमावलवन हांणी शुक्रारा सकाळीं जाहीरपणान सांगिल्लें, तांचो पक्ष टीव्हीकेक तेंको दितलो, पूण तेंक्याचें उपचारीक पत्र रातीं उसरां मेरेन राज्यपालाक सादर करूंक नाशिल्लें. ताका लागून शेनवारा जावपी विजय हांच्या मुख्यमंत्रीपदाच्या सोपूत सुवाळ्याक परतून एकदां कळाव जालो.
राज्यपालाच्या कार्यालयांतल्या सुत्रांनी दिल्ले म्हायती प्रमाण, शुकारा सांजे जाल्ले बसकेंत विजय हांचे वांगडा 11 आमदार आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
