भांगरभूंय | प्रतिनिधी
‘भारतांतलें अपघाती मरण आनी आत्महत्या’ अहवालांतली म्हायती
भांगरभूंय । प्रतिनिधी
पणजी : गोंयांत 2024 त वट्ट 2,682 रस्तो अपघातांची नोंद जल्ली. तातूंत 289 जाणांक मरण आयिल्लें. तातूंतलें 278 जाणांक (96.19 टक्के) बेजापसालदार, घोतक पद्दतीन गाडी चलोवप वा चुकीचे पद्दतीन ओव्हरटेक करप वा धोफरायत गाडयो चलयिल्ल्यान मरण आयिल्लें. 2024 त सोरो पियेवन वा घुंवळे वखदांचे नशेंत गीडी चलोवपी 5 जाणांक मरण आयिल्लें. राष्ट्रीय नोंदणी विभागाच्या (एनसीआरबी) ‘भारतांतलीं अपघाती मरणां आनी आत्महत्या’ ह्या अहवालांतल्यान ही म्हायती मेळ्ळ्या.
अहवाला प्रमाण, गोंयांत 2024 त रस्तो अपघातांत धोकादायक पद्दतीन गाडी चलयिल्ल्यान 167 जाणांक रस्तो अपघातांत मरण आयिल्लें, धोफरायक गाडी चलयिल्ल्यान 113 जाणांक मरण आयिल्लें, ते भायर रस्त्याचेर जनावर आडवें आयिल्ल्यान 12 जाणांक अपघात जाल्ले. तातूंत दोगांक मरण आयिल्लें. चुकीचे पद्दतीन गाडी पार्क केल्ल्यान दोगांक मरण आयिल्लें. पेड्डेर रस्त्यांक लागून आनी गाडी चालकाक शारिरीक समस्या उप्राशिल्ल्यान दरेकी एकल्याक मरण आयिल्ल्याची नोंद जाल्ली. गाडी चलयतना अचकीत गाडयेंत बिघाड जाल्ल्यान 2 अपघात जाल्ले, तातूंत एकलो जखमी जाल्लो. मात ह्या कारणाक लागून एकाय मरणाची नोंद जावंक ना.
गोंयांत 2023 चे तुळेंत 2024 त रस्तो अपघातांचें प्रमाण 5.8 टक्क्यांनी उणें जालां. जाल्यार जखमींचें प्रमाण 2.40 टक्के आनी मरणांचें प्रमाण 1.02 टक्क्यांनी उणें जालां. 2023 त वट्ट 2,847 रस्तो अपघातांनी 292 जाणांक मरण आयिल्लें. तातूंत धोकादायक पद्दतीन गाडी चलयिल्ल्यान 127, धोफरायत गाडी चलयिल्ल्यान 154, सोरो पियेवन गाडी चलयिल्ल्यान 6, रस्त्याचेर जनावर आडवें आयिल्ल्यान दोगांक मरण आयिल्लें. चुकीचे पद्दतीन गाडी पार्क केल्ल्यान, गाडयेंत बिघाड जाल्ल्यान आनी गाडी चालकाक शारिरीक समस्या आयिल्ल्यान दरेकी एकल्याक मरण आयिल्लें.
मरण आयिल्ल्यां मदीं 72 टक्के दुचाकीचालक
गोंयांत 2024 त म्हयन्याक सरासकी 87 टक्के रस्तो अपघात जाल्यार सरासरी 24 जाणांक मरण आयिल्ल्याचें नोंद जालां. मरण आयिल्ल्या मदीं 209 (72 टक्के) दुचाकी चलयताले. 16 मोटार चालक, 8 ट्रक चालक, 3 तीन चाकी चालक, जाल्यार 4 मोटरसायकल चालकांक मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
