भांगरभूंय | प्रतिनिधी
सिटीजन फॉर डेमोक्रॅसी केंद्रीय वीज मंत्र्यांक बरयतली पत्र
भांगरभूंय । प्रतिनिधी
पणजी : स्मार्ट वीज मिटर सक्तीचे ना, ते ऐच्छीक आसा, अशें केंद्रीय वीज मंत्र्यान लोकसभेंत स्पश्ट केलां आसतना लेगीत गोंयांत स्मार्ट वीज मिटराची सक्ती सरकारा कडल्यान जाता. हे विशी कायद्या प्रमाण राज्याक योग्य ते निर्देश दिवपाची मागणी करपी पत्र केंद्रीय वीज मंत्री मनोहरलाल खट्टर हांकां बरोवपाचो निर्णय सिटीजन फॉर डेमोक्रॅसी संघटणेन घेतला. सिटीजन फॉर डेमोक्रॅसी संघटणेचे वांगडी एल्वीस गोम्स हांणी ही म्हायती दिली.
स्मार्ट मिटर हो सक्तीचो ना. तो ऐच्छीक आसा, अशें निवेदन केंद्रीय मंत्री मनोहरलाल खट्टर हांणी 2 एप्रील 2026 ह्या दिसा लोकसभेंत केलां. हो संदर्भ दीत गोंय सरकाराक योग्य ते निर्देश दिवचे, अशी मागणी आमी पत्रांत करतले. स्मार्ट मिटराक हरकत घेवपी पत्र आमी प्रदेश भाजप अध्यक्ष दामू नायक हांकां सादर केलां. पक्षा वतीन सरकारा कडेन हो विशय मांडचो, अशी मागणी आमी केल्या, अशें गोम्स हांणी सांगलें.
स्मार्ट मिटर बसोवप हें सगल्या राज्यांक केंद्रान बंधनकारक केलां. हाका लागून आमकां तें बसोवपाचेच पडटले. आतां मेरेन 1 लाख स्मार्ट मिटर बसोवन जाल्यात, अशें वीजमंत्री सुदिन ढवळीकार हांणी सांगलां. स्मार्ट मिटर सक्तीचे आसात, हें खंयच्या कायद्यांत वा नेमांत आसा? तांणी कायदो वा कलम सांगप गरजेचें आसा. तशेंच 1 लाख स्मार्ट मिटर बसयल्यात, तो आंकडो तांकां कसो आयलो, हे लेगीत स्पश्ट जावपाक जाय, असें गोम्स हांणी म्हणलां. वीज खात्यान स्मार्ट मिटर बसोवपाक लोकांनी सहकार्य करपाची नोटीस कलम 163 खाला जारी केल्या. 163 कलमा खाला फकत घरांत प्रवेश करपाक मेळटा. ही नोटीस कलम 171 खाला काडपाची गरज आशिल्ली. वीज खात्यान काडिल्ली नोटीस बेकायदो आसा. स्मार्ट मिटरा विशीं वीज खात्या कडेन आरटीआय खाला आमी म्हायती मागली. स्मार्ट मिटराक लागून रेडिएशन तयार जातलें. रेडिएशनाचो परिणाम भोंवतणी जातलो काय कितें? हे विशीं चांचणी जाल्या काय कितें? ह्या प्रस्नांची आमचे कडेन म्हायती ना, अशी जाप मेळ्ळ्या. तशेंच स्मार्ट मिटरांत प्रीपेड तशेंच पोस्टपेड बील भरपाची वेवस्था आसतली, अशें वीजमंत्री सांगता. वीज खात्याचे अधिक्षक अभियंते मात फकत प्रीपेड बील भरपाची वेवस्था आसतली, अशें सांगता. स्मार्ट मिटरा विशीं वीज मंत्र्यांक लेगीत सारकी म्हायती ना, हें स्पश्ट जाता. ह्या सगल्या गजालींची म्हायती केंद्रीय वीज मंत्र्यां मेरेन पावयतले, अशें एल्वीस गोम्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
