भांगरभूंय | प्रतिनिधी
नवी दिल्ली, खबरां संस्थाः कर्मचारी भविष्य निधी संघटना मे म्हयन्याच्या निमाणे मेरेन एटीएम आनी यूपीआय वरवीं पीएफाचे पयशे काडपाची सुविधा सुरू करतले. ईपीएफओ 3.0 उपक्रमांतल्यान कसलेच कागदपत्र नासतना रोखडेच पयशे काडपाक मेळटले.
पीएफ संबंदीत सगळ्यो प्रक्रिया वापरप्यांक सोंपें जातल्यो. हातूंत ऑटो-क्लेम सेटलमेंट आनी कर्मचाऱ्यांच्या पसंतीच्या बँक खात्यांत निधी थेट हस्तांतरित सारकिल्ल्यो सुविधा आसपावीत आसात. एटीएम आनी यूपीआयचो पर्याय उपलब्ध जाल्ल्यान पीएफ खातेंधारकांक कार्यालयांत वचपाची गरज पडची ना. एटीएम वा यूपीआय वरवीं पयशे काडपा खातीर ईपीएफओ मर्यादा थारायतले. हाचे खाला वापरप्यांक तांच्या पीएफ खात्यांत जमा केल्ल्या वट्ट रक्कमेंतल्यान चडांत चड 50% पयशे काडपाक मेळटले.
ईपीएफओ 3.0 कितें?
ईपीएफओ म्हळ्यार कर्मचारी भविष्य निधी संघटना. ही पगारांतल्यान कट जावपी पीएफ रक्कम वेवस्थापन करता आनी निवृत्ती खातीर बचत करपाक सुविधा दिता. ईपीएफओ 3.0 हें ताचें नवें डिजिटल अपग्रेड आसा. जें 7.8 कोटी वांगड्यांक पीएफ प्रक्रिया सोपी आनी गतीची करतली. ईपीएफओ 2.0 त पयलींच कांय सुदारणा जाल्ली. पूण ईपीएफओ 3.0 गेम-चेंजर मानतात.
एटीएम-यूपीआय वरवीं पीएफ काडपाची सुविधा कितें आनी ती कशी चलतली?
ईपीएफओ 3.0 चें हें सगळ्यांत खाशेलें खाशेलपण. सध्या पीएफ काडपा खातीर ऑनलायन फॉर्म भरून कागदपत्रां सादर करची पडटात. मागीर 7-10 दीस वाट पळोवची पडटा. पूण ईपीएफओ 3.0त, जशें तुमी डेबिट कार्डांतल्यान पयशे काडटात तशें तुमकां एटीएम वरवीं तुमच्या पीएफ खात्यांतल्यान थेट पयशे काडपाक मेळटले. तेच बरोबर फोनपे, गूगलपे सारक्या यूपीआय अॅपा वरवीं 1 लाख रुपया मेरेन ट्रान्सफर करपाक मेळटा.
एटीएम आनी यूपीआय वरवीं पीएफ पयशे कशे काडचे?
हे नवे प्रक्रियेंत ईपीएफओ आपल्या वांगड्यांक खाशेलें एटीएम कार्ड दितले, जें तांच्या पीएफ खात्या कडेन जोडिल्लें आसतलें. ह्या कार्डाचो वापर केल्यार वांगड्यांक आपले पीएफ पयशे थेट एटीएम मशीनांतल्यान काडपाक मेळटले. देखून, यूपीआय वरवीं पयशे काडपा खातीर पीएफ खातें यूपीआय कडेन जोडचें पडटलें. हाचे उपरांत वांगड्यांक तांच्या बँक खात्यांत पीएफ पयशे हस्तांतरीत करपाक मेळटले.
एटीएम, यूपीआय वरवीं पयशे काडपा खातीर कांय अटी आसतल्यो. वांगड्याचो युनिव्हर्सल अकाउंट नंबर (UAN) सक्रिय आसपाक जाय. तो आधार, पॅन, बँक खातें क्रमांक, आयएफएससी कोड अशा कागदपत्रां कडेन जोडिल्लो आसपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
