भांगरभूंय | प्रतिनिधी
पणजीः गोंयांत मजा-मस्ती करपा खातीर आयिल्ल्या कर्नाटकांतल्या पर्यटकांक कन्नड संगीत लावंक नाशिल्ल्यान तिडक आयली. सोऱ्याचे घुंवळेंत आशिल्ल्या ह्या पर्यटकांनी मेजाचेर बियरीची बाटली फोडली, ग्लास फोडलो आनी वेटराक बडयलो. उपरांत फोडिल्लो ग्लास आनी बाटलेचे पयशे बिलांत घालतकच तांचेनी काउंटराचेर झगडीं सुरू केली. ह्या प्रकरणांत कळंगुट पुलिसांनी दयानंद करजागी (23, बेळगांव) हाका प्रतिबंधात्मक कारवाये खाला अटक केली.
ही घडणूक शुक्रारा, 8 मेच्या रातीं घडली. कर्नाटकांतल्या बेळगांव शारांतल्या चार पर्यटकांचो पंगड बागा दर्यादेगेर आशिल्ल्या ‘गुड लक’ शॅकांत जेवपाक गेल्लो. जेवणा वांगडाच ते बियर आनी सोरो पियेताले. मजगतीं, शॅकाची वीज पुरवण कांय काळ बंद जाली. वीज परतून आयले उपरांत तांणी वेटराक कन्नड पदां वाजोवपाचो हट्ट धरलो. पूण, वेटरान न्हयकार दिलो. रातच्या धा वरां उपरांत स्पीकराचो आवाज उणो जाले उपरांत तांची तिडक वाडली आनी तांणी सोऱ्याची बाटली आनी मेजाचेर आशिल्लो ग्लास फोडलो आनी वेटराक बडयलो.
हे संबंदीं शॅकाच्या धनयान लुकसाण भरपाय तांच्या बिलांत जोडली. हाका लागून ह्या पर्यटकांनी काउंटराचेर झगडपाचो यत्न केलो. शॅकाचो धनी जॉन लोबो हाचे कडेन वाद घालो. आमी नौदलाचे कर्मचारी आसात तुमचो शॅक बंद करतले अशीय धमकी दिली. ही घडणूक घडटा आसतना शॅकाचो धनी लोबोन कळंगुट पुलिसांक म्हायती दिली. हे म्हायतीचेर आदारून बेळगांवच्या दयानंद करजागी (23) ह्या पर्यटकाक पुलिसांनी अटक केली. पुलीस ह्या प्रकरणाची फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
