सुवेंदू अधिकारी हांणी घेतलो अस्तंत बंगालचे मुख्यमंत्री म्हूण सोपूत

भांगरभूंय | प्रतिनिधी

कोलकाता, खबरां संस्थाः अस्तंत बंगालच्या राजकारणांतल्या इतिहासांत सुवेंदू अधिकारी हांणी शेनवारा अस्तंत बंगालांत भाजपाचे पयले मुख्यमंत्री म्हूण सोपूत घेतलो. तांचे वांगडा मंत्रीमंडळांतल्या हेर पांच आमदारांनीय मंत्रीपदाचो सोपूत घेतलो.
कोलकाताच्या ब्रिगेड परेड मैदानाचेर जाल्ल्या भव्य सोपुत विधी सुवाळ्याक प्रधानमंत्री नरेंद्र मोदी, केंद्रीय गृहमंत्री अमित शाह, केंद्रीय संरक्षण मंत्री राजनाथ सिंग, भाजपाचे वरिश्ठ फुडारी, आनी वेगवेगळ्या राज्यांचे मुख्यमंत्री हाजीर आशिल्ले.
सुवेंदू हांचे सयत बंगालचे राज्यपाल आर. एन. रवी हांणी हेर पांच आमदारांक मंत्री पदाचो सोपुत दिलो. हातूंत दिलीप घोष, अग्निमित्र पॉल, अशोक कीर्तनिया, खुदीराम टुडू आनी निशित प्रमाणिक हांचो आस्पाव आसा.
हालींच जाल्ले विधानसभा वेंचणुकेंत भाजपान 293 सुवाती मदल्या 207 सुवाती जिखून इतिहासीक जैत मेळयलें. ह्या जैताक लागून तृणमूल काँग्रेसीची 15 वर्सांची सत्ता सोंपली. हाका लागून आदली मुख्यमंत्री ममता बॅनर्जीक व्हड राजकी धपको बसला. सुवेंदू अधिकारी हांणी नंदीग्राम आनी भवानीपूर ह्या दोनूय मतदारसंघांनी जैत मेळयले. भवानीपूरांत तांणी ममता बॅनर्जी हांकां 15,115 मतांनी हारयले.