भांगरभूंय | प्रतिनिधी
पणजी: गोंय लोकसेवा आयोगा वतीन (जीपीएससी) विवीध खात्यांनी 25 सुवातांचेर भरती करतले. हातूंतल्यो 9 सुवातो ट्रान्स्फर ऑन डेप्युटेशनाच्यो आसात. ह्या सुवातां खातीर आयोगाच्या संकेत थळार ऑनलायन पद्दतीन अर्ज करपाची निमाणी मुजत 26 जून मेरेन आसा. जाल्यार हेर 14 सुवातां खातीर निमाणी मुजत 22 मे मेरेन आसा. हातूंत 3 सुवातो बिडियो, 4 सुवातो मानसोपचारतज्ञ, उपनगर नियोजकाच्यो 2, क्लिनिकल मानसशास्त्रज्ञां खातीर 2 सुवातांचो आस्पाव आसा.
कार्मीक खात्यांत ब्लॉक डेव्हलपमेंट अधिकाऱ्यांच्या 3 सुवातां खातीर पिरायेची मर्यादा 45 आसा. हातूंतली 1 सुवात आरक्षीत आसतली. हे खातीर खंयच्याय फांट्याची पदवी, कोंकणीचें ज्ञान आसप गरजेचें आसा. उपनगर नियोजकाच्या पदा खातीर ह्या विशयातली पदवी, 2 वर्सांचो अणभव आसप गरजेचें आसा.
भलायकी खात्यांत दांत म्हाविद्यालयांत लेक्चररा खातीर 5 सुवातो भरतले. हे खातीर पदव्युत्तर पदवी, दांत परिशदे कडेन नोंदणी आसप गरजेचें आसा. आयपीएचबींत 4 मानसोपचारतज्ञाच्या सुवाते खातीर वैजकी पदव्युत्तर पदवी आसप गरजेचें आसा.
तशेंच ह्या सुवातां खातीर 2 वर्सांचो अणभव आसप गरजेचें आसा. मानसशास्त्रज्ञांच्या 2 सुवातां खातीर पदव्युत्तर पदवी, उण्यांत उणो दोन वर्सांचो अणभव आसप गरजेचें आसा. पर्यावरण खात्यांत शास्त्रीय अधिकारी, सहाय्यक संचालक ह्या पदांच्यो दरेकी 2, सहाय्यक अभियंत्याच्यो 3, पर्यावरण अधिकारी आनी सहाय्यक संचालक (तंत्रीक) ह्या पदाची दरेकी एक सुवात ट्रान्स्फर ऑन डेप्यटेशना वरवीं भरतले.
सगल्या पदां खातीर अर्जाचे शुल्क ऑनलायन वा ऑफलायन पद्दतीन भरले उपरांत अर्ज गृहीत धरतले अशें आयोगान स्पश्ट केलां. उमेदवारांनी अर्ज भरचे पयलीं आयोगाच्या संकेत थळा वेली सुचोवणी वाचप गरजेची आसा. आयिल्ल्या अर्जांची छाननी करून फुडली भरती प्रक्रिया करतले अशें आयोगान स्पश्ट केलां.
सगल्या पदां खातीर कोंकणी भाशेचें ज्ञान आसप गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
