भांगरभूंय | प्रतिनिधी
भायल्यांनी गोंय आपणा खातीर केले दुबय
भांगरभूंय । प्रतिनिधी
पणजी : गोंयकारांच्या सुशेगाद वृत्ती खातीर गोंयकारांच्या सगळ्या पारंपरीक वेवसायांचेर आतां भायल्या लोकांनी कब्जो केला. सगळे वेवसाय करून तांणी गोंय हे दुबय केलां. गोंयकारांनी फकत नोकरे खातीर यत्न करी नासताना कितें तरी वेवसाय सुरू करपाच्या नदरेतल्यांन विचार करचो, असो उलो मुख्यमंत्री डॉ. प्रमोद सावंत हांणी मारला.
साखळे रवींद्र भवनांत प्रधानमंत्री रोजगार येवजणे खाला पीएमईजीपी कार्यावळींत ते उलयताले. प्रधानमंत्री रोजगार येवजणे खाला उद्देग खात्यान कार्यावळीचे आयोजन केल्ले. ह्या वेळार मुख्यमंत्र्यां हस्तुकीं कांय उद्देजकांचो भोवमान जालो.
मुद्रा लोन, प्रधानमंत्री रोजगार येवजण अशो तरेकवार येवजण्यो आसाथ. हाचो लाव घेवन तरणाट्यांनी आवड आशिल्लो वा पारंपरीक वेवसाय सुरू करपाक जाय. वेवसाय सुरू करपा खातीर फकत पयशेंच आसले म्हूण जायना. मेहनत तशेंच आपली तकली चलोवपाची गरज आसा. हांव कोणूय मेळ्ळो की तूं कसलो वेवसाय करता? असो प्रस्न करता. ताका हांव ताची येणावळ विचारता. उमळशीकेंतल्यान हांव ही चवकशी करता. ह्या वेळार रत्नदीप सावंत हांचो भोवमान जालो. पारंपरीक शिंपी वेवसाय फुडें व्हरतना ताणें टी शर्ट तयार करून तांची विक्री सुरू केली. ताची म्हयन्याची येणावळ देड लाख रूपया आसा, हे उदाहरण मुख्यमंत्र्यांनी दिले. नोकरी करता आसत जाल्यार तुमचो पगार 50 ते 60 हजारा मेरेन जाता. वेवसायांत तुमी लाखा वयर पयशें जोडू शकतात. अन्न प्रक्रिया, केटरिंग अशा वेवसाया मदीं बऱ्योच संदी आसा, अशेंय मुख्यमंत्र्यांनी सांगलें.
प्रधानमंत्री रोजगार निर्मिती कार्यावळींतल्यान (पीएमईजीपी) गोंयांत 12 हजार जाणांक रोजगार मेळ्ळा. 1320 ल्हान उद्येगांक 100 कोटींचें रिण सवलतीच्या दरांत दिलां. हे भायर 34.82 कोटींचें अनुदान उद्देगांक दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
