भांगरभूंय | प्रतिनिधी
म्हापशेंः म्हापशेंच्या एकतानगरांतल्या वाठारांत एक धक्को दिवपी घडणूक घडल्या. ल्हान भुरग्यांच्या खेळा वयल्यान सुरु जाल्ल्या ल्हानशा वादावेल्यान बिरेस्तारा रातीं दोन शेजारी कुटुंबां मदीं व्हडलें पेटलें. केस्तावाचें रुपांतर मारमारींत जालें. हातूंत एकल्याक बडयांनी बडयलो आनी फुलांचो वाझ घेवन ताचेर जीवघेणो हल्लो केलो. हातूंत तो गंभीर जखमी जाला. हे घडणुकेक लागून पुराय वाठारांत बोवाळ पडला.
म्हापशें पुलिशेंतल्यान मेळिल्ले म्हायती प्रमाण, बिरेस्तारा सकाळीं भुरगीं मैदानांत खेळटा आसतना कांय कारणांक लागून तांचे मदीं वाद जालो. हो वाद फकत भुरग्यां मेरेन मर्यादीत उरलो ना. सकाळीं दोनूय कुटुंबांतल्या बायलांनी तातूंत तोंड घाले. तांचे मदीं उतरांनी वाद जालो. उपरांत कांय प्रमाणांत वातावरण शांत जालें. पूण दोनूय कुटुंबां मदीं तणाव तसोच उरलो. उपरांत बिरेस्तारा सांजवेळार दोनूय कुटुंबांतले दादले वाद घालपाक लागले. आनी ह्या वादाचे रुपांतर हल्ल्यांत जालें.
ह्या झगड्यांत तकलेक गंभीर दुखापत जाल्लो म्हापशेंच्या जिल्हो हॉस्पिटलांत आसा. दोनूय वटेनचे कांय जाण किरकोळ जखमी जाल्यात. दोनूय कुटुंबांनी म्हापशें पुलीस स्टेशनांत हे संबंदी एकामेकां आड कागाळी दाखल केल्यात. ह्या प्रकरणांत पुलिसांनी चवकशी सुरू केल्या. ह्या झगड्याचें नेमके कारण आनी हो वाद कसो हिंसक जालो हाची चवकशी पुलिस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
