भांगरभूंय | प्रतिनिधी
फाटल्या कांय वर्सांत अॅसिडीटीची समस्या खूब वाडल्या. 10 लोकांमदल्या 8 जाणांक अॅसिडीटीचो त्रास जाता. हाचे फाटलें कारण म्हणल्यार बदलिल्ली जिणे पद्दत, कामाचो वेळ, भायले खाण खावप, फास्ट फूड आनी मसाल्याचे चड खावप. हाका लागून अॅसिडीटीची समस्या दिसानदीस गंभीर जायत आसा. दिसाच्या कामाक लागून वेळार आनी योग्य जेवण जायना, जाल्यार रातच्या वेळार पोटभर आनी मसाल्याचे तिखट खावप जाता. देखून सकाळीं उठले उपरांत अॅसिडीटी जाता.
ॲसिडिटी म्हळ्यार ‘आम्लपित्त’ वा ‘पोटात आम्ल वाडप’. हो पचना कडेन संबंदीत समस्या आसा. पोटांत हायड्रोक्लोरिक ॲसिडाची पातळी गरजे परस चड वाडल्यार काळजात वा पोटांत दुखपाक लागता, आंबट ढेकर येवप अशीं लक्षणां दिसतात.
सकाळीं उठले उपरांत रिकाम्या पोटाचेर केळीं खाल्यार अॅसिडीटी उणी करपाक मजत जाता अशें आयुर्वेदांत म्हळां. पचना खातीर केळी खावप बरें अशें जाणकार सांगतात. तशेंच ह्या फळांत आम्ल उणें आशिल्ल्यान अॅसिडीटी उणी करपा खातीर तें फायदेशीर मानतात. ते भायर केळींत पोटॅशियम आनी फायबर भरपूर आसता, जें पचन तंत्र निरोगी दवरपाक मजत करता. अॅसिडीटी आनी बद्धकोश्ठता सारकिल्ल्या समस्यांचेर मात करपा खातीर केळीं खावप सगळ्यांत बरें मानतात.
केळी खावपाची योग्य पद्दत…
सकाळीं उठले उपरांत रिकाम्या पोटाचेर एक वा दोन केळीं खाल्यार अॅसिडीटी नियंत्रीत करपाक मदत जाता. हाचे भायर केळीं धय वांगडा वा सॅलड पद्दतीन खावंक शकतात.
अॅसिडीटी जाल्यार अशी जतनाय घेवची…
सकाळीं उठले उपरांत एक पेलो गरम उदक पियेल्यार अॅसिडीटी उणी जाता. तशेंच अॅसिडीटी आसल्यार सकाळीं उठल्या उपरांत कॉफी वा च्या पियेवंक फावना, नाजाल्यार अॅसिडीटीची समस्या आनीक वाडटली.
अॅसिडीटी टाळपा खातीर….
अॅसिडीटी जावची न्हय म्हणून रातचें न्हिदेच्या 3 वरां आदीं जेवण करचें. हाका लागून सेवन केल्लें अन्न पचपाक फावो तो वेळ मेळटा. न्हिदेचो वेळ जालो आनी जेवण उरलें जाल्यार त्या वेळार हलको आहार करचो. आनी फावो ती न्हीद घेवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
