भांगरभूंय | प्रतिनिधी
पणजीः गोमंतक भंडारी सामाजाचेर नेमिल्ल्या प्रशासकांनी 10 मे दिसा आपयिल्ली समाजाची आम सभा नेमा प्रमाण ना. ह्या आम सभेंत संस्थेच्या मध्यवर्ती कार्यकारी समितीची वेंचणूक घेवपाची पद्दत आनी काळमर्यादा थारावपाची आशिल्ली. पूण उच्च न्यायालयाच्या निर्णया उपरांत हो अजेंडा काडून उडयलो. देखून आम सभेंत कार्यकारी समितीचे वेंचणुके विशीं चर्चा जावची ना अशें देवानंद नायक हांणी सांगलें. शुक्रारा पणजेंत जाल्ले पत्रकार परिशदेंत ते उलयताले. त्या वेळार समाजाचे हेर पदाधिकारी हाजीर आशिल्ले.
देवानंद नायक हांणी सांगलें, 25 एप्रीलाक प्रशासकांनी नोटीस जारी करून 10 मे दिसा आम सभ घेवपाची घोशणा केल्ली. सुरेश कळंगुटकार हांमी वेंचणुकेच्या अजेंडा संबंदी न्यायालयांत याचिका दाखल केल्ली. हाचेर न्यायालयान अजेंडा वगळपाचो आदेश दिल्लो. न्यायालयाच्या आदेशा उपरांत प्रशासकांनी दुरुस्तीची नोटीस जारी केल्या. कांय जाण हे बाबतींत लोकांक चुकीची म्हायती दितात. आयज आमी ताचे स्पश्टीकरण दिलां. वेंचणुकेचेर चर्चा जावची ना म्हणून हे आम सभेक वचप काय ना हो निर्णय समाजांतल्या लोकांनी घेवचो.
सरकारान 4 मार्चाक समाजाचेर प्रशासकांची नेमणूक केल्ली. प्रशासक नेमचे पयलीं सरकारान आमकां कारणा दाखोवपाची नोटीस दिवपाची गरज आशिल्ली. पूण हें जावंक ना. देखून आमी 7 मार्चाक याचिका दाखल केल्या. सध्याच्या गीमाच्या सुटयेक लागून सुनावणी जूनांत जातली. कायद्या प्रमाण आमी येग्य आशिल्ल्यान आमकां न्याय मेळटलो असो आमकां विस्वास आसा. गरज पडल्यार आमी वयल्या न्यायालयांत वचपाचो विचार करतले. आमी ही याचिका दाखल केल्ल्यान 10 मे दिसा जावपी आम सभेंक आमी हाजीर रावचे नात अशेंय तांणी सांगलें.
प्रशासकांक लागून समाजाचेर अर्थीक भार
सरकारी नेमा प्रमाण प्रशासकांचो सगले खर्च, भत्तो आनी पगार गोमंतक भंडारी समाजाच्या खात्यांतल्यान दितले. सध्या समाजाची अर्थीक स्थिती तितली बरी ना. अशे परिस्थितींत प्रशासकांक लागून समाजाचेर अर्थीक भार वाडला अशेंय नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
