भांगरभूंय | प्रतिनिधी
पणजीः कला आनी संस्कृती संचालनालयान 2025-2026 वर्साचे राज्य सांस्कृतीक पुरस्कार, कला गौरव पुरस्कार, कला सम्मान पुरस्कार आनी युवा सृजन पुरस्कार जाहीर करिनासतना सरळ 2026-2027 पुरस्कारा खातीर अर्ज मागयल्यात. हाका लागून संबंदीत कलाकारां मदीं बोवाळ जाला.
दर वर्सा हे पुरस्कार आनी उत्कृश्ट सांस्कृतीक संस्था आनी वाचनालयांक जानेवारी म्हयन्या मेरेन पुरस्कार दितात. पूण मे म्हयनो आयलो तरी लेगीत हे पुरस्कार दिवंक नात. तेच बरोबर वेंचून काडिल्ल्या कलाकारांचीं नांवां लेगीत जाहीर करुंक नात. हाचे वयल्यान निवड प्रक्रिया पुराय जावंक ना हें स्पश्ट जाता. अशें आसून लेगीत फुडल्या वर्साच्या म्हळ्यार 2026-2027च्या पुरस्कारा खातीर अर्ज मागयिल्ल्यान कलाकारां मदीं बोवाळ जाला. कारण 2025-26 वर्साच्या पुरस्कारा खातीर मेळिल्ल्या अर्जांतल्यान जांची निवड जावंक ना तांच्या नांवांची शिफारस 2026-27 वर्साच्या पुरस्कारा खातीर करपाची संद आसता. पूण फाटल्या वर्साची निवड जाहीर जालीच ना. जाल्यार त्या कलाकारांक आपल्याक पुरस्कार फावो जाला काय ना हें कळचेंच ना आनी परतून अर्ज करचो काय ना हें लेगीत कळचें ना.
देखून कला आनी संस्कृती संचालनालयान पयलीं 2025-26 वर्सा खातीरच्या पुरस्कारांची प्रक्रिया पुराय करची आनी उपरांतच 2026-27 वर्साच्या पुरस्कारा खातीर अर्ज स्विकारचे अशी मागणी कलाकारांनी केल्या. पुरस्कार वांटप मागीर करचे, पूण पयलीं पुरस्कार फावो जाल्ल्यांची नांवां वेंचून काडून जाहीर करचीं अशें संबंदीत कलाकारांचे म्हणणें आसा.
मजगतीं, सांस्कृतीक संस्थांक दितात तें देखरेखीचें अनुदान (मेंटेनन्स ग्रँट) अजून दिवंक नाशिल्ल्याचें संबंदीत संस्थां कडल्यान कळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
