संवसारीक रेड क्रॉस दीस

भांगरभूंय | प्रतिनिधी

संवसारीक रेड क्रॉस दीस हो संकश्टाच्या काळांत मानवता, करुणा आनी एकवट हांचें म्हत्व याद करून दिवपी दीस आसा.

संवसारीक रेड क्रॉस दीस हो दर वर्सा 8 मे ह्या दिसा संवसारभर मनयतात. हॅन्री ड्युनांट हे रेड क्रॉसाचे तशेंच आंतरराष्ट्रीय रेडक्रॉस समितीचे (ICRC) संस्थापक आशिल्ले, तांचो जल्म 1828 वर्सा जिनिव्हांत जाल्लो. ते एक खूब नामनेचे व्यक्ती आशिल्ले आनी तांकां पयलो नोबॅल शांतताय पुरस्कार मेळिल्लो.
जगभरांत लोक खूबशा कारणांक लागून मरतात. दुकळ आसूं, भुंयकांप आसूं, दुयेंसाक लागून आसूं नाजाल्यार अपघाताक लागून आसूं. पयलींच्या काळांत व्हड झुजां जातालीं. आपल्या राज्याचें साम्राज्य करपाक लागून राजा आपल्या दुस्माना कडेन लडाय करताले. ते लडायेंत कितल्याशाच लोकांक मरण येतालें. मेल्लो मनीस परतून येनाशिल्लो. पूण जखमी सैनिकाची आनी लोकांची परिस्थिती बिकट आसताली. तांकां कोण आधार करिनाशिल्लो, वा तांचेर उपचार करपाक लेगीत उशीर जातालो. जखमी सैनीक वा लोकांची व्यथा कोणाकूच समजनाशिल्ली.
रेड क्रॉससो सायटीचें म्हत्व ताच्या इतिहासांत लिपिल्लें आसा. जीन-हेन्री ड्युनांट, एक स्वीस वेपारी, 1859 वर्सा इटलींत जाल्ल्या सॉल्फेरिनो झुजाचे साक्षिदार आशिल्ले. ह्या झुजांत व्हड प्रमाणांत सैनिकांक मरण आयलें, आनी खूबशे जाण जखमी जाल्ले. जखमी सैनिकांची काळजी घेवपा खातीर खंयच्याच सैन्या कडेन वैजकी सुविधा नाशिल्ली.
ड्युनांट हांणी आपवावुरप्यांचो एक गट तयार केलो. तांणी झुजांत जखमी जाल्ल्या सैनिकां खातीर जेवण आनी उदक हाडलें. इतलेंच न्हय, तर तांचेर उपचारूय केले.
हे घडणुके उपरांत तीन वर्सांनी हेन्रीन आपलो अणभव ‘अ मेमरी ऑफ सॉल्फेरिनो’ (A Memory of Solferino) ह्या पुस्तकाच्या स्वरुपांत उजवाडा हाडलो. पुस्तकांत ताणें सदांकाळचें आंतरराष्ट्रीय समाज स्थापन करपाची सुचोवणी केल्या. झुजांत जखमी जाल्ल्यांचेर उपचार करपाक शकपी समाज. जो खंयच्याय देशाच्या नागरिकत्वाचेर न्हय तर मानवतावादी आधाराचेर लोकां खातीर काम करता. ताच्या सुचोवणीची अंमलबजावणी फुडल्याच वर्सा जाली.
संवसारीक रेड क्रॉस दीस हो संवसाराच्या इतिहासांतलो एक म्हत्वाचो दीस जावन आसा. जो पुराय संवसारांतल्या गरजू लोकांक मजत करपा वांगडाच जीव वाटावपाच्या कामांत व्हड फाटबळ दिवपा खातीर दर वर्सा मनोवप जाता. हो दीस हेन्री ड्युनांट हांच्या जल्मदिसा निमतान मनोवप जाता, जांणी 1863 वर्सा स्वित्झर्लंडातल्या जिनिव्हा हांगा आंतरराष्ट्रीय रेड क्रॉस समितीची (ICRC) स्थापणूक केली. झूज, अन्नाची उणाव, धामीचें दुयेंस वा सैमीक आपत्तींक लागून संकश्टांत आशिल्ल्या लोकांक मजत करप ही समितीची मोख आशिल्ली. उत्सवाचो उद्देश पुराय करपा खातीर आनी लोकांक ताचें म्हत्व पटोवन दिवपा खातीर, दर वर्सा एका विशेश संकल्पने (Theme) वरवीं हो दीस मनोवप जाता. तशेंच, कसल्याय प्रकारच्या आपत्तीन पिडेस्त जाल्ल्या गरजू लोकांक मजत करपा खातीर चडांत चड खाजगी वा सरकारी संस्थांक सक्रीय वांगडी म्हणून आनी प्रादेशीक पांवड्यार वांटेकार करून घेवप, होय ह्या दिसाचो एक उद्देश आसा.
संवसारीक रेड क्रॉस दिसाचें उद्दिश्ट रेड क्रॉस आनी रेड क्रिसेंट चळवळीन संवसारीक पांवड्यार केल्ल्या मानवतावादी कार्याचो भोवमान करप हें आसा. ही संस्था आपल्या तत्वां विशीं, ध्येयां विशीं आनी कार्यावळीं विशीं जागृताय वाडोवपाची, तशेंच तिचे आपवावुरपी आनी कर्मचारी हांचें समर्पण आनी धैर्याची वळख करून दिवपाची संद म्हूण काम करतात. संवसारीक रेड क्रॉस दीस हो संकश्टाच्या काळांत मानवता, करुणा आनी एकवट हांचें म्हत्व याद करून दिवपी दीस आसा. रेड क्रॉस आनी रेड क्रेसेंट चळवळीन मानवतावादी आदार दिवपांत आनी संवसारभर मानवतावादी मुल्यांक प्रोत्साहन दिवपाक निभाविल्लें म्हत्वाचें कार्य ह्या दिसा उजवाडाक येता. नॅशनल रेड क्रॉस आनी रेड क्रेसेंट सोसायटीज, इंटरनॅशनल फेडरेशन ऑफ रेड क्रॉस आनी रेड क्रेसेंट सोसायटीज (IFRC) आनी ICRC वांगडा दर वर्सा 8 मे दिसा संवसारीक रेड क्रॉस दिसा निमतान जायत्यो कार्यावळी आनी उपक्रम आयोजीत करतात. ह्या उपक्रमांनी रक्तदान मोहीम, प्रथमोपचार प्रशिक्षण सत्र, जनजागृती मोहीम आनी फावो ते स्वयंसेवक आनी मानवतावादी कामाची वळख करून दिवपाचो आस्पाव आसूं येता.
रेड क्रॉसचे मुख्य उद्देश (CoreObjectives) अशें आसातः:
मानवीय आदार (HumanitarianAssistance): झूज, आपत्ती आनी आणिबाणिच्या वेळार बळी पडिल्ल्यांक मजत करप.
भलयकी आनी जतनाय (Health andCare): भलायकी वाडोवप, दुयेंसां आडावप आनी वखदी सेवा, पयली मजत (first aid) प्रशिक्षण आनी समाजसेवा कार्यावळीं वरवीं लोकां वेले त्रास उणें करप.
रगत सेवा (BloodServices): सुरक्षीत रगता पुरवण जावची म्हूण रगत संक्रमण सेवा (blood transfusion services) चलोवप.
आपत्ती वेवस्थापन (DisasterManagement): सैमीक आपत्ती आनी भलायकी आणिबाणिच्या काळा खातीर पूर्व तयारी करप आनी ताका प्रतिसाद दिवप.
मानवीयतत्वांचो प्रसार (Promotion of Humanitarian Principles): आंतरराष्ट्रीय मानवीय कायदो (IHL) आनी सात मुलभूत तत्वांचो (मानवता, निस्पक्षता, तटस्थता, स्वतंत्रता, स्वेच्छा सेवा, एकता आनी व्यापकता) प्रसार करप.
पुनर्वसन (Rehabilitation): संकश्टांतल्यान भायर सरपी पिडितांक परतें बरेवपा खातीर (पुनर्वसन) मजत करप.

प्रा. किशोर वासुदेव वझे
नागेशीं