भांगरभूंय | प्रतिनिधी
वाळपय: बिरेस्तारा सांजवेळा अचकीत सत्तरी म्हालांतल्या खूबशा वाठारांनी पावस पडलो. सुमार अर्द वर ते एक वर पडिल्ल्या पावसाक लागून लोकजीण विस्कळीत जाली. गोंय-बेळगांव मार्गा वेल्या चोर्ला घांट मार्गार झाड पडिल्ल्यान थोडो वेळ येरादारीची कोंयडी जाली. वाळपय उजो पालोवपी दळाच्या जवानांनी ताकतिकेन घडणूक थळार धांव घेवन झाड कुशीक काडले उपरांत येरादारी परतून सुरू जाली.
मजगतीं, पयल्याच पावसाक लागून खूबशा वाठारांनी रस्ते निसरडे जाल्ल्यान दुचाकी चालकांक अपघाताक सामकार वच्चें पडलें. पर्यें आनी बिंबल-सत्तरी वाठारांत कांय दुचाकी चालक निसरून पडिल्ल्यान थोड्यांक किरकोळ दुखापत जाली.
हिवरें-सत्तरे हांगाय रस्त्यार झाड पडिल्ल्यान थोडो वेळ आडमेळीं निर्माण जाल्ली. तशेंच कांय वाठारांनी वादळी वाऱ्याचो फटकोय बशिल्ल्याची म्हायती मुखार आयल्या.
मजगतीं, सकाळ सावन गरमी जाणवताली. सांजवेळा चार वरांच्या सुमाराक अचकीत पावसाक सुरवात जाली. ठाणें, हिवरें, कोपाड्डें, वाळपय तशेंच हेर वाठारांनी बरे प्रमाणांत पावस पडिल्ल्याची म्हायती मेळ्ळ्या. अचकीत पावस पडिल्ल्यान पावसाक लागून लोकांची धांदल जाली. खूबशे कडेन दुचाकी चालक आडकून पडले.
गोंय-बेळगांव मजगतच्या चोर्ला घांट मार्गार झाड पडिल्ल्यान म्हामार्ग कांय काळ येरादारी खातीर बंद जाल्लो. हाची म्हायती मेळटकच वाळपय उजो पालोवपी दळाचे जवान रोखडेच घडणूक थळार दाखल जाले आनी तांणी झाड कुशीक काडून येरादारी सुरळीत केली.
पावसाच्या दिसांनी चोर्ला घांट मार्गार झाडां पडप तशेंच पालसणां कोसळपाच्यो घडणुको सेगीत घडत आसतात. ताका लागून आपत्कालीन वेवस्थापन यंत्रणेन हाचे कडेन विशेश लक्ष दिवन पावसा पयलीं गरजेच्यो उपाय येवजण्यो करच्यो अशी मागणी नागरिकां कडल्यान जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
