भांगरभूंय | प्रतिनिधी
खबरां संस्था
नवी दिल्ली : तामिळनाडूंत सरकार घडोवपा खातीर राजकी हालचालीक गती आयल्या. अभिनेतो विजयाची पार्टी तामिलगा वेत्री कडगमान (टीव्हीके) आतां आनीक एका आमदाराचें समर्थम मेळोवपाचे यत्न सुरू केल्यात. मेळिल्ले म्हायती प्रमाण टीव्हीकेन टीटीवी दिनाकरनाची पार्टी अम्मा मक्कल मुनेत्र कडगमचे (एएमएमके) एकसुरे जैतवंत आमदार कमराज एस हांचे कडेन संपर्क केला.
टीव्हीकेचे हे यत्न अशा वेळार मुखार आयल्यात, जेन्ना सरकार घडोवपा खातीर राज्यपाल राजेंद्र आर्लेकार आनी पार्टी हांचे मदीं पेच निर्माण जाला. सुत्रांच्या म्हणण्या प्रमाण टीव्हीके फावोश्या भोवमता बगर स्थीर सरकार चलोवपाक शकतले, हाचो राज्यपालाक अजून विस्वास ना. जाल्यार पार्टीच्या फुडाऱ्यांनी दावो केला, तांकां बेगिनूच गरजेचें समर्थन मेळटलें.
मजगतीं, एआयएडीएमके हाणे लेगीत आपल्या आमदारां विशीं चड सादुरताय वाडयल्या. पार्टीचे म्हासचीव एडप्पादी के पलानीस्वामी पुड्चेरीच्या पूरनकुप्पमांतल्या एका खाजगी रिसोर्टांत पावले, जंय मिडिया रिपोर्टा प्रमाण तामिळनाडूच्या 28 एआयईएडीएमके आमदारांक दवरल्यात. आपले आमदार फुटचे न्हय आनी संभाव्य राजकी चेपणा पसून वाटावपा खातीर पार्टीन हें पावल उखल्लां अशें मानतात.
विजय हाचे पार्टीन 234 वांगड्यांचे विधानसभेंत 108 जागे जिखल्यात. सरकार घडोवचे खातीर ताका 118 आमदारांची गरज आसा. हाचो अर्थ विजयाक अजून 10 आमदारांच्या समर्थनाची गरज आसा.
अस्तंत बंगालांतलें मंत्रीमंडळ बरखास्त
कोलकाता : अस्तंत बंगालाच्या राजकारणांत व्हड घडामोड जाल्या. विधानसभेचो कार्यकाळ सोंपताच राज्यपालान पुराय मंत्रीमंडळ बरखास्त केलां. ताका लागून ममता बॅनर्जी आतां मुख्यमंत्री उरूंक ना. विधानसभा वेंचणुकेंत तृणमूल काँग्रेसीची हार जाले उपरांत ममता बॅनर्जी हांणी राजिनामो दिवची ना, अशी भुमिका घेतिल्ली. ताका लागून पेचप्रसंग निर्माण जाल्लो. ह्या घटनात्मक पेचांतल्यान राज्यपालान मार्ग काडला. कोलकाता गॅझेटांत जारी केल्ले अधिसुचोवणे प्रमाण, राज्यपाल आर. एन. रवी हांणी विधानसभा बरखास्त केल्या. हो निर्णय 7 मे 2026 सावन लागून जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
